प्रयागराज : कानपुरात गेल्या शुक्रवारी झालेल्या हिंसाचारानंतर (Prayagraj Violence), पहिल्यांदा जुम्म्याची नमाज पढण्यात आली. यासाठी संपूर्ण राज्यात हाय अलर्ट जारी करण्यात आला होता. मात्र, तरीही उत्तर प्रदेशातील (Uttar Pradesh) तीन शहरांत नमाजानंतर तीव्र आंदोलन करण्यात आलं. प्रयागराजमध्ये हिंसाचार झाला असून नमाज झाल्यानंतर, जमावानं निदर्शने केली आणि जोरदार दगडफेक केलीय. परिस्थिती नियंत्रणाबाहेर गेली असून पोलीस (Police) अधिकारी जखमी झाले आहेत.

प्रयागराजमध्ये झालेल्या दगडफेकीत पोलीस अधिकारी जखमी झाले आहेत. काही घरांमधून पोलिसांवर दगडफेक झाल्याची माहिती आहे. पोलिसांनीही त्या दगडफेकीला प्रत्युत्तर दिलं. पोलिसांच्या बंदोबस्तानंतरही जमाव ऐकण्यास तयार नसल्याचं दिसलं. पोलिसांवर दगडफेक करण्यात आली असून पोलीस अधीक्षकांच्या गाडीचीही तोडफोड करण्यात आल्याची माहिती आहे. प्रयागराज झोनचे एडीजी प्रेम प्रकाश यांनी दिलेल्या माहितीनुसार, काही संघटनांनी पूर्ण तयारीनिशी ही घटना घडवलीय. प्रयागराजमधील हिंसाचारात डाव्या संघटना, पीएफआय, एआयएसए, सीएए आणि एनआरसी चळवळीला पाठिंबा देणारे लोक आहेत. सुमारे 3 तासांच्या संघर्षानंतर परिस्थिती पूर्णपणे नियंत्रणात आलीय.

प्रयागराजमध्ये हिंसाचार निर्माण करणाऱ्यांची ओळख पटली असून 40 जणांना अटक करण्यात आलीय. तर, 1000 हून अधिक जणांना ताब्यात घेण्यात आलंय. एडीजीच्या म्हणण्यानुसार, सामाजिक कार्यकर्त्या सारा अहमद, एआयएमआयएमचे जिल्हाध्यक्ष शाह आलम, डावे नेते डॉ. आशिष मित्तल, इमाम अली अहमद यांनी हा हिंसाचार घडवल्याचा पोलिसांचा अंदाज आहे.