नवी दिल्ली : देशात सध्या राष्ट्रपती निवडणुकीची चर्चा असून विरोधकांकडून मोदी सरकारला आव्हान देण्यासाठी सक्षम उमेदवाराची शोधाशोध सुरु आहे. यामध्ये सुरुवातीलाच राष्ट्रवादी काँग्रेसचे नेते शरद पवार यांच नाव आघाडीवर होतं. पण आपल्याला अद्याप सक्रीय राजकारण करायचं असल्याचं सांगत त्यांनी माघार घेतली. त्यानंतर आता जम्मू-काश्मीरचे माजी मुख्यमंत्री फारुख अब्दुल्ला यांनीही आपल्याला सक्रीय राजकारण करायचं कारण सांगत माघार घेतली आहे. (Presidential Election Farooq Abdullah Withdraws From Presidential Race)

आपली उमेदवारी मागे घेताना अब्दुल्ला यांनी म्हटलं की, जम्मू-काश्मीर सध्या महत्वाच्या काळातून प्रवास करत आहे. या अनिश्चित काळाला दिशा देण्यासाठी जम्मू-काश्मीरला माझ्या मदतीची गरज आहे. माझ्यासाठी यापुढील काळात मोठं सक्रीय राजकारण खुलं आहे.

जम्मू-काश्मीर आणि देशाची सेवा करण्यात सकारात्मक योगदान देण्यासाठी मी सज्ज असून माझं नाव राष्ट्रपतीपदासाठी सुचवल्याप्रकरणी पश्चिम बंगालच्या मुख्यमंत्री ममता बॅनर्जी यांचा मी आभारी आहे, असंही अब्दुल्ला यांनी म्हटलं आहे.