नवी दिल्ली : रशियाच्या स्पुटनिक लाईट सिंगल डोस कोरोना प्रतिबंधक लसीचं भारतात लवकरच उत्पादन सुरु होणार आहे. यासाठीची चर्चा अंतिम टप्प्यात असल्याची माहिती रशियाचे परराष्ट्र मंत्री सर्गी लॅव्हरोव यांनी नवी दिल्ली येथे दिली. रशियाचं राष्ट्राध्यक्ष व्लादिमिर पुतीन यांचं शिष्टमंडळ सध्या भारत दौऱ्यावर आहेत.

रशियाच्या संरक्षण आणि परराष्ट्र मंत्र्यांसोबत भारताचे परराष्ट्र मंत्री एस. जयशंकर यांच्यामध्ये द्विपक्षीय चर्चा झाली. या बैठकीनंतर पत्रकारांशी बोलताना लॅव्हरोव म्हणाले, स्पुटनिक लाईटच्या भारतातील उत्पादनाबाबतची चर्चा अंतिम टप्प्यात आहे. दोन डोसच्या स्पुटनिक व्ही या लसीच्या भारतातील उत्पादनाबाबतच्या कराराची सध्या अंमलबजावणी सुरु आहे. पण स्पुटनिक लाईटचं उत्पादन मोठ्या प्रमाणावर व्हावं ही अपेक्षा आहे. यामध्ये प्रत्येक वर्षाला शंभर मिलियन डोस बनवणं अपेक्षित आहे.

सप्टेंबर महिन्याच्या मध्यावर डीसीजीआयच्या तज्ज्ञांच्या समितीनं स्पुटनिक लाईटच्या तिसऱ्या आणि अंतिम टप्प्यातील चाचणीसाठी परवानगी दिली होती. या चाचण्यांना एकदा मंजुरी मिळाल्यानंतर भारतात पहिल्या सिंगल डोस स्पुटनिक लाईट डोसचा वापर सुरु होईल.

भारतात सध्या तीन लस वापरल्या जात आहेत. यामध्ये ब्रिटिश-स्विडीश कंपनी अॅस्ट्राझेनेका आणि भारताच्या सिरम इन्स्टिट्युटनं उत्पादित केलेली कोविशिल्ड, भारत बायोटेकनं बनवलेल्या स्वदेशी कोव्हॅक्सिन आणि रशियाच्या स्पुटनिक व्ही या लसींचा समावेश आहे. दरम्यान, अमेरिकेतील मॉडर्ना आणि जॉन्सन अँड जॉन्सन या दोन लसींना देखील भारतात आपत्कालिन वापरासाठी मंजुरी मिळाली आहे. पण अद्याप या लसींचे डोस भारतात सुरु करण्यात आलेले नाहीत.