अहमदाबाद : पाटिदार नेते हार्दिक पटेलचा एका तरुणीसोबतचा कथित व्हिडिओ व्हायरल झाल्याने अडचणीत आलेल्या हार्दिकला पाठिंबा देत काँग्रेस उपाध्यक्ष राहुल गांधी यांनी हार्दिकवर दबाव आणण्याचा प्रय़त्न केला जात असल्याचे म्हटले आहे.

राहुल गांधी म्हणाले, की अशा प्रकारचे व्हिडिओ व्हायरल करून हार्दिकवर दबाव आणण्याच प्रय़त्न केला जात आहे. हार्दिक पटेलचा आवाज कोणीच दाबू शकत नाही. गुजरातची दोन मुले महात्मा गांधी आणि सरदार वल्लभभाई पटेल यांनी इंग्रजांना भारतातून पळवून लावलेले आहे.

या कथित व्हिडिओ संबंधी हार्दिक पटेलने खुलासा करताना म्हटले होते, की गुजरातमध्ये भाजपच्या घाणेरड्या राजकारणाला सुरवात झाली आहे. कितीही बदनामी केली तरी मला फरक पडणार नाही, पण गुजरातमधील महिलांचा अपमान केला जात आहे गुजरातमधील सहा कोटी जनता माझ्यासोबत आहे. भाजपविरोधातील लढा सुरूच राहणार. भाजपची जुनी सवय आहे. संजय जोशी लोकप्रिय होत असताना भाजपने हीच खेळी खेळली होती.