हैदराबाद, ता. ५ (पीटीआय) : ‘‘पंतप्रधान मोदी हे कायमच आरक्षणाच्या विरोधात होते आणि आताही त्यांना जनतेचे आरक्षण काढून घ्यायचे आहे,’’ असा आरोप काँग्रेसचे नेते राहुल गांधी यांनी आज केला. देशात आता आरक्षणाची मर्यादा ५० टक्क्यांच्या पुढे नेण्याची गरज आहे, असे मतही राहुल यांनी व्यक्त केले.

तेलंगणमधील आदिलाबाद लोकसभा मतदारसंघात आज राहुल गांधी यांची प्रचारसभा झाली. यावेळी ते म्हणाले,‘‘यंदाची लोकसभा निवडणूक ही विचारांची लढाई आहे. आम्ही राज्यघटना वाचविण्याचा प्रयत्न करत आहोत, तर भाजप आणि रा. स्व. संघाला लोकांचे हक्क नष्ट करायचे आहेत. नरेंद्र मोदी हे प्रथमपासूनच आरक्षणाच्या विरोधात आहेत. त्यांना जनतेचे आरक्षण काढून घ्यायचे आहे. मात्र, आरक्षणाची मर्यादा ५० टक्क्यांहून अधिक वाढविण्याची खरी गरज आहे. सत्तेत आल्यास ही मर्यादा वाढवू, असे आम्ही जाहीरनाम्यातच स्पष्ट केले आहे.’’

पंतप्रधान मोदी हे सार्वजनिक क्षेत्राचे खासगीकरण करत असल्याचाही आरोप राहुल गांधी यांनी केला. ‘‘विविध क्षेत्रांमध्ये या सरकारने कंत्राटीकरण सुरू केले. आरक्षण काढून टाकण्यासाठीच हे पाऊल उचलले आहे. आम्ही सत्तेत आल्यास ही पद्धत बंद करू. नोकऱ्या कायमस्वरूपी असतील, तात्पुरत्या नसतील. या सरकारला मात्र राज्यघटनाचा समाप्त करायची असल्याने आरक्षण ते रद्द करतीलच. दलित, मागासवर्गीय, आदिवासी हे कायमच अविकसित राहावेत, अशीच भाजपची इच्छा आहे,’’ असा आरोपही राहुल यांनी केला. तेलंगणमध्ये सत्तेत आल्यावर आधी आश्‍वासन दिल्यानुसार आम्ही महिलांना बसमधून मोफत प्रवास सुरू केला, असेही राहुल यांनी निदर्शनास आणून दिले.

राहुल गांधी म्हणाले
- जातीनिहाय जनगणना करू
- गरीब कुटुंबातील महिलांना दरवर्षी एक लाख रुपये देऊ
- राज्यघटनेचे संरक्षण करू
- देशातील जनतेला ‘न्याया’ची गॅरंटी