नवी दिल्ली : संयुक्त किसान मोर्चाने आज रेल रोको आंदोलनाची हाक दिली आहे. लखीमपूर खिरीमध्ये झालेल्या शेतकऱ्यांच्या हत्येप्रकरणी केंद्रीय गृहराज्यमंत्री अजय मिश्र टेनी यांचं निलंबन व्हावं तसेच त्यांना अटक व्हावी यासाठी आंदोलन सुरु आहे. याआधीच या 18 ऑक्टोबर रोजी देशभरात रेल रोकोची हाक देण्यात आली होती. रेल्वेच्या संपत्तीला कसल्याही प्रकारचं नुकसान न पोहोचवता रेल्वे रोको आंदोलन शांततेने केलं जाईल, अशी माहिती देण्यात आली आहे. याबाबतची ग्वाही संयुक्त किसान मोर्चाकडून देण्यात आली आहे. या दरम्यान रस्ता रोको केला जाणार नाही, फक्त रेलरोको केला जाईल.

सहा तासांसाठी सेवा राहतील बंद

संयुक्त किसान मोर्चाचे नेते बलबीर राजेवाल यांनी म्हटलंय की, आधीच घोषित केल्याप्रमाणे किसान मोर्चा आणि त्याचे सहकारी घटक 18 ऑक्टोबर रोजी संपूर्ण भारतात सकाळी 10 ते सायंकाळी 4 वाजेपर्यंत रेल्वे सेवा बंद ठेवतील. त्यांचा हा कार्यक्रम रेल्वे संपत्तीला बाधा न पोहोचवता शांतपणे होईल. न्याय मिळेपर्यंत आंदोलन सुरुच राहिल, असं देखील त्यांनी म्हटलंय.

उत्तर प्रदेशातील लखीमपूर खेरी येथे हिंसाचार होऊन ९ जणांचा मृत्यू झाला होता. यामध्ये चार शेतकऱ्यांचा समावेश असून चार भाजप कार्यकर्त्यांचा समावेश आहे. तसेच एका पत्रकाराचा समावेश आहे. याप्रकरणी केंद्रीय गृहराज्य मंत्री अजय मिश्रा यांच्या मुलासह १५ जणांविरोधात तिकोनिया पोलिसात गुन्हा नोंद करण्यात आला आहे. या घटनेचा सर्वच स्तरातून निषेध नोंदविला जात आहे. या प्रकरणी गृहराज्य मंत्र्यांचा राजीनामा घेतला जावा, अशी मागणी शेतकऱ्यांकडून केली जात आहे.