जयपूर : राजस्थानमधून (Rajasthan) एक धक्कादायक घटना समोर आलीय. एकाच कुटुंबातील 3 बहिणींनी त्यांच्या 2 मुलांसह आत्महत्या केलीय. कालू मीना, ममता आणि कमलेश अशी या महिलांची नावं आहेत. या तिघांचं वय 25, 23 आणि 20 वर्षे आहे. त्याच वेळी, एक मूल 4 वर्षांचं होतं आणि दुसरं फक्त 27 दिवसांचं होतं. मृत्युमुखी पडलेल्या तीनपैकी दोन महिला गर्भवती असल्याचंही सांगण्यात येतंय. या घटनेनंतर तिन्ही बहिणींचा सासरच्या घरात हुंड्यासाठी वारंवार छळ आणि मारहाण केल्याचा आरोप कुटुंबीयांनी केलाय, त्यामुळं तिघांनीही आत्महत्या केलीय, असं त्यांचं म्हणणं आहे.

मृत महिलांचे चुलत भाऊ हेमराज मीना यांनी सांगितलं की, माझ्या बहिणींचा हुंड्यासाठी सतत छळ केला जात होता, त्या 25 मे रोजी बेपत्ता झाल्या होत्या. आम्ही त्यांना शोधण्यासाठी घरोघरी फिरलो. त्यानंतर आम्ही स्थानिक पोलीस (Rajasthan Police) ठाण्यात फोन केला आणि एफआयआर दाखल केला. तसंच राष्ट्रीय महिला आयोगाकडंही (National Commission for Women) तक्रार केली, पण आम्हाला मदत मिळाली नाहीय. बहिणींनी सुसाईड नोट लिहिली नसली, तरी त्यांच्या कुटुंबीयांनी सर्वात धाकटी बहीण कमलेशनं व्हॉट्सअॅप स्टेटस शेअर केले होते, त्यात तिनं म्हटलं होतं, 'आम्ही आता जात आहोत, तुम्हा सुखी रहा. माझ्या सासरचे आमच्या मृत्यूचं कारण आहेत. त्यामुळं रोज मरण्यापेक्षा एकदाच मेलेलं बरं, असं तिनं नमूद केलंय.

ती पुढं म्हणते, 'आपण एकत्र मरण्याचा निर्णय घेतलाय. पुढच्या जन्मात आपण एकत्र जन्म घेऊ. आम्हाला मरायचं नाहीय, पण आमचे सासरचे लोक आम्हाला त्रास देताहेत. आमच्या मृत्यूमध्ये माझ्या आई-वडिलांचा दोष नाहीय.' दरम्यान, महिला बेपत्ता झाल्यानंतर चार दिवसांनी पोलिसांनी शनिवारी सकाळी डुडू गावातील विहिरीतून तिन्ही पीडित महिला आणि दोन मुलांचे मृतदेह बाहेर काढले. त्यानंतर पीडितांचे पती आणि सासरच्या लोकांविरुद्ध क्रूरतेसह इतर गुन्ह्यांसाठी गुन्हा दाखल करण्यात आलाय. या हत्येप्रकरणी पोलीस तिन्ही महिलांचे पती, सासू आणि इतर कुटुंबीयांची चौकशी करत आहेत.