नवी दिल्ली : आधी कोरोना आणि आता रशिया-युक्रेन (Russia Ukraine War) यांच्यातील वादामुळे खाद्यतेलाच्या किमती कमालीच्या वाढल्या आहेत. त्याचा परिणाम आता मोहरीच्या तेलाच्या (Mustard Oil) दरावरही होण्याची शक्यता तज्ज्ञांनी व्यक्त केली आहे. देशभरातील बाजारपेठांमध्ये खाद्यतेलाच्या किमतीत मोठी वाढ झाली आहे. विशेषतः रिफाइंड आणि सूर्यफूल तेलाच्या किमती गेल्या 15 दिवसांत सुमारे 30 टक्क्यांनी वाढल्या आहेत. 15 दिवसांपूर्वी रिफाइंड ऑईल (Refined Oil Price) 140 रुपये प्रति लिटर होतं, ते आता 165 रुपये प्रति लिटर झालं आहे. सूर्यफूल तेल पूर्वी 140 रुपये होतं, ते आता 170 रुपये झालं आहे. त्याचबरोबर देशी तुपाचा दर पूर्वी 360 रुपये होता, त्यात आता 420 रुपयांनी आणि वनस्पती तेलात 20 रुपयांनी वाढ झाली आहे.

रशिया आणि युक्रेन हे सूर्यफूल तेलाचे सर्वात मोठे उत्पादक आहेत. आधी कोरोना आणि आता युद्धामुळे पुरवठा साखळीवर मोठा परिणाम झाली आहे. त्याचा परिणाम जगभरातील बाजारपेठांवर दिसून येतोय. खाद्यपदार्थांच्या किमती वाढण्यामागे काही कारणं असल्याचं तज्ज्ञांचं म्हणणं आहे. यामध्ये रशिया आणि युक्रेन युद्ध, महागडी शिपमेंट, पुरवठा लाइनमध्ये येणाऱ्या अडचणी आणि हिवाळ्यातील पाम तेलाची आयात या सर्व कारणांचा समावेश आहे.

आंतरराष्ट्रीय बाजाराच्या व्यवहारांचा अभ्यास असणारे तज्ज्ञ डॉ. रवी सिंग सांगतात की 20% स्वयंपाकाचे तेल युक्रेनमधून येते, त्यामुळे मोहरीचे तेल महाग झाले. मात्र सरकारने आयात खर्च कमी केला होता, त्यामुळे किंमती खाली आल्या, परंतु युक्रेन आणि युक्रेनमध्ये सुरू असलेला वाद थांबायचं नाव घेत नाहीये. त्याचा परिणाम आता पुरवठ्यावर होत असून, मोहरीच्या तेलावरही त्याचा परिणाम होऊ शकतो. सध्या परिणाम दिसत नसले तरी नंतरच्या काही महिन्यांत मोहरीच्या तेलाच्या किमतीतही २० टक्क्यांनी वाढ होऊ शकते.