श्रीनगर : जम्मू-काश्मीरमधील कुलगाम जिल्ह्यात सोमवारी सुरक्षा दलाने दोन दहशतवाद्यांचा खातमा केला. दहशतवाद्यांची ओळख अद्याप पटलेली नाही. ट्रुब्जी परिसरातील नौपोरा-खेरपोरा येथे दहशतवादी असल्याची खबर मिळताच सुरक्षा दलाने वेढा घालून शोध मोहीम सुरु केली होती. दरम्यान, पाकिस्तानच्या सीमेलगत एका घुसखोराला सीमा सुरक्षा दलाच्या जवानांनी गोळ्या घालून ठार केले.

सोमवारी पहाटे चार वाजण्याच्या सुमारास जम्मूमधील बकारपूर येथील लष्कराच्या चौकीजवळ हा प्रकार घडला. घुसखोराची चाहूल लागताच जवानांनी गोळीबार सुरु केला. घुसखोराचा मृतदेह अद्याप सीमेवरील कुंपणापाशी पडून आहे. तसेच डोडा जिल्ह्यात काल रात्री एका दहशतवाद्याला दारूगोळ्यासह अटक करण्यात आली.