Board Exam: केंद्रीय शिक्षण मंत्री धर्मेंद्र प्रधान यांनी काल (सोमवारी) सांगितले की, विद्यार्थ्यांना 2025-26 या शैक्षणिक सत्रापासून इयत्ता 10वी आणि 12वी बोर्डाच्या परीक्षा दोनदा बसण्याचा पर्याय उपलब्ध असणार आहे. छत्तीसगडमध्ये 'PM SHRI' (प्राइम मिनिस्टर स्कूल फॉर रायझिंग इंडिया) योजनेच्या शुभारंभाच्या कार्यक्रमात प्रधान बोलत होते.

या योजनेंतर्गत राज्यातील 211 शाळा श्रेणीसुधारित करण्यात येणार आहेत. पं. दीनदयाळ उपाध्याय सभागृह, रायपूर येथे हा सोहळा आयोजित करण्यात आला होता. राष्ट्रीय शैक्षणिक धोरणांतर्गत केंद्राच्या योजनेवर बोलताना प्रधान म्हणाले की, 2025-26 या शैक्षणिक सत्रापासून विद्यार्थ्यांना 10वी आणि 12वी बोर्डाच्या परीक्षेत दोनदा बसण्याची संधी मिळेल.

ते म्हणाले की, नवीन शैक्षणिक धोरणाद्वारे विद्यार्थ्यांना तणावमुक्त ठेवणे, त्यांना गुणवत्तेने समृद्ध करणे, त्यांना संस्कृतीशी जोडून ठेवणे आणि भविष्यासाठी त्यांना तयार करणे हे पंतप्रधान नरेंद्र मोदी यांचे ध्येय असून 2047 पर्यंत भारताला विकसित देश बनविण्याचे हे सूत्र आहे.

प्रधान यांनी राज्यातील मागील काँग्रेस सरकारवरही टीका केली, की मागील सरकारमध्ये शिक्षणाला प्राधान्य दिले गेले नाही, तर नवनिर्वाचित विष्णू देव साईंच्या राजवटीच्या प्रयत्नांवरून शिक्षणालाच त्यांचे प्राधान्य असल्याचे दिसून येते.

केंद्रीय मंत्री म्हणाले की, 'पीएम श्री योजने'च्या पहिल्या टप्प्यात, छत्तीसगडमधील 211 शाळा (193 प्राथमिक स्तर आणि 18 माध्यमिक शाळा) 'हब आणि स्पोक मॉडेल' वर श्रेणीसुधारित केल्या जातील. राज्याचे शिक्षणमंत्री बृजमोहन अग्रवाल यांच्या मागणीनुसार या योजनेच्या पुढील टप्प्यात अधिक माध्यमिक व उच्च माध्यमिक शाळांना योजनेच्या कक्षेत आणले जाईल.

प्रधान यांनी दरवर्षी शाळेत '10 बॅग फ्री डे' सुरू करण्याच्या संकल्पनेबद्दल सांगितले आणि विद्यार्थ्यांना कला, संस्कृती आणि क्रीडा इत्यादींशी जोडण्यावर भर दिला. यावेळी मुख्यमंत्री विष्णुदेव साई, राज्याचे शालेय व उच्च शिक्षण मंत्री बृजमोहन अग्रवाल आणि अधिकारी उपस्थित होते.