देशासाठी प्राणांची आहुती देणाऱ्या सैनिकांच्या बलिदानाचे स्मरण म्हणून तेवत असणारी इंडिया गेटवरील अमर ज्योत राष्ट्रीय युद्ध स्मारकातील ज्योतीमध्ये विलीन केली गेली. त्यानंतर इंडिया गेटवरील अमर जवान ज्योती विझवण्यात आली. अमर जवान ज्योती विझवण्याच्या मोदी सरकारच्या निर्णयानंतर छत्तीसगडच्या भूपेश बघेल सरकारने छत्तीसगड येथे अमर जवान ज्योतीची पायाभरणी करणार असल्याची घोषणा केली आहे.

३ फेब्रुवारीला काँग्रेस नेते राहुल गांधी यांच्या हस्ते अमर जवान ज्योतीची पायाभरणी होणार आहे. छत्तीसगडचे मुख्यमंत्री भूपेश बघेल यांनी याविषयी माहिती दिली. जे देशासाठी लढत नाहीत त्यांना या अमर जवान ज्योतीचे महत्त्व समजणार नाही. मोदी आणि आमची विचारसरणी कधीही मेळ घालणार नाही. काँग्रेसची विचारसरणी ही गांधीजींची विचारसरणी आहे. सत्य, अहिंसेची विचारसरणी आहे तर मोदींची विचारसरणी ही गोडसे, सावरकरांची विचारसरणी जी हिंसाचार आणि कट रचणारी आहे, अशी प्रतिक्रिया भूपेश बघेल यांनी दिली.