नवी दिल्ली : संसदेचं हिवाळी अधिवेशन उद्या 29 नोव्हेंबरपासून सुरु होत आहे. त्याआधी सर्वपक्षीय गटनेत्यांची बैठक झाली आहे. या बैठकीबाबत बोलताना शिवसेनेचे खासदार विनायक राऊत यांनी म्हटलंय की, संसदेच्या कामकाजाची वेळ वाढविण्याची गरज आहे. कारण 19 दिवस हे अधिवेशन चालणार आहे. पण त्यात 31 विधेयके मांडली जाणार आहेत. पुढे त्यांनी म्हटलंय की, कृषी विधेयके मागे घेतली जात आहेत मात्र, शेतकऱ्यांचे बळी देखील गेले आहेत. केंद्रीय मंत्र्यांच्या मुलाने काही बळी घेतले आहेत. त्यामुळे मंत्र्यांनी राजीनामा दिला पाहिजे, अशी मागणी देखील त्यांनी केली आहे.

संसदेच्या हिवाळी अधिवेशनापूर्वी सरकारने बोलावलेल्या या सर्वपक्षीय बैठकीत अनेक विरोधी पक्षांनी पेगासस पाळत प्रकरण, महागाई आणि बेरोजगारी यावर चर्चेची मागणी केली आहे. अधिवेशनाच्या पूर्वसंध्येला झालेल्या बैठकीला उपस्थित प्रमुख विरोधी पक्षांच्या नेत्यांमध्ये काँग्रेसचे मल्लिकार्जुन खर्गे, अधीर रंजन चौधरी आणि आनंद शर्मा, टी.आर. द्रमुककडून बाळू आणि तिरुची शिवा, राष्ट्रवादीकडून शरद पवार, शिवसेनेकडून विनायक राऊत, समाजवादी पक्षाकडून रामगोपाल यादव, बसपकडून सतीश मिश्रा, बीजेडीकडून प्रसन्न आचार्य आणि नॅशनल कॉन्फरन्सचे नेते फारूख अब्दुल्ला यांचा समावेश आहे.