उत्तर प्रदेश : अमेठीतील स्मृती इराणी यांचे निकटवर्तीय सुरेंद्र सिंग यांची हत्या करणाऱ्या पाच संशयितांपैकी तिघांना उत्तर प्रदेश पोलिसांनी अटक केली असून दोन संशयित फरार आहेत. 

उत्तर प्रदेशचे पोलिस महासंचालक ओ. पी. सिंह यांनी सांगितले की, मिळालेल्या पुराव्यांनुसार हत्या करणारे आरोपी हे स्थानिक असून राजकीय वादातून ही हत्या करण्यात आली होती. पाच जणांवर संशय असून त्यापैकी तीन जण अटकेत आहेत, तर इतर दोन संशयित फरार असून त्यांचा शोध सुरू आहे. त्यांना लवकरात लवकर अटक करण्यात येईल. 

सुरेंद्र सिंग हे बरौलिया गावचे प्रमुख होते. तसेच ते स्मृती इराणी यांचे विश्वासू कार्यकर्ते होते. त्यांची शनिवारी (ता. 25) रात्री घरात घुसून हत्या करण्यात आली होती. 

नुकत्याच झालेल्या लोकसभा निवडणुकीवेळी सुरेंद्र सिंग यांनी अमेठी मतदार संघात स्मृती इराणी यांचा प्रचार केला होता. या मतदार संघातून स्मृती इराणी यांनी राहुल गांधी यांना पराभूत केले. सुरेंद्र सिंग यांचे मारेकरी पाताळात लपले तरी त्यांना शोधून काढू, असे स्मृती इराणी यांनी रविवारी (ता. 26) म्हटले होते.