बंगळूर : आंध्र प्रदेशचे मुख्यमंत्री एन. चंद्राबाबू नायडू (N. Chandrababu Naidu) यांनी तिरुपतीच्या तिरुमला मंदिरात (Tirupati Temple) दिल्या जाणाऱ्या लाडूच्या प्रसादात प्राण्यांची चरबी वापरली जात असल्याच्या वक्तव्यानंतर मोठा वाद निर्माण झाला आहे. आता कर्नाटकातील सर्व प्रमुख मंदिरांमध्ये भाविकांना दिला जाणारा प्रसाद चाचणीनंतर भक्तांना वाटला जाईल, असे धर्मादाय विभागाचे (Charity Department) मंत्री रामलिंगा रेड्डी यांनी सांगितले.

कर्नाटकात एंडोमेंट विभागाच्या देखरेखीखाली ३४ हजार मंदिरे आहेत. त्यापैकी ‘अ’ वर्ग २०५ मंदिरांचे वार्षिक उत्पन्न २५ लाखांपेक्षा जास्त आहे. ‘ब’ वर्ग १९३ मंदिरांचे वार्षिक उत्पन्न ५ लाख ते २५ लाख रुपये आहे. उर्वरित पाच लाखांपेक्षा कमी उत्पन्न असलेली मंदिरे ‘क’ वर्ग म्हणून वर्गीकृत आहेत. राज्यातील मंदिरांमध्ये अशा कोणत्याही घटना किंवा फसवणूक झाल्याची घटना नाही.

पण, भक्तांना शंका नको म्हणून आम्ही प्रसादाची तपासणीचे आदेश देऊ. सर्व प्रमुख मंदिरांना केवळ कर्नाटक दूध महामंडळ (केएमएफ) द्वारे पुरवलेले नंदिनी तूपच वापरावे. इतर कोणत्याही ब्रँडचे तूप वापरू नये, यासाठी परिपत्रक जारी केले जाईल. कर्नाटक अनेक वर्षांपासून लाडू बनवण्यासाठी तिरुपतीला नंदिनी तुपाचा पुरवठा करत आहे.