नवी दिल्ली- देशातील विविध भागामध्ये पावसाने हाहाकार माजवला आहे. उत्तराखंडमध्ये देखील पूरस्थिती निर्माण झाली आहे. अनेक लोकांचे स्थलांतर केले जात आहे. त्यांना सुरक्षितस्थळी नेले जात आहे. अशावेळी एनडीआरएफचे जवान महत्त्वाची भूमिका बजावत असताना दिसत आहेत. एनडीआरएफच्या जवानांच्या धाडसाचा एक व्हिडिओ सोशल मीडियावर व्हायरल होत आहे. व्हिडिओ पाहून लोक एनडीआरएफच्या जवानांचे कौतुक करत आहेत.

व्हिडिओ उत्तराखंडच्या हरिद्वारमधील आहे. याठिकाणी एक तरून पुराच्या पाण्यामध्ये वाहून जात होता. अशावेळी एनडीआरएफच्या जवानांनी जीवाची पर्वा न करता नदीमध्ये उडी घेऊन तरुणाचे प्राण वाचवले आहेत. व्हिडिओ पाहून घटनेचा थरार अनुभवता येईल. जवानाने केलेली ही कामगिरी कौतुक करण्यासारखीच आहे. 'साम टीव्ही'ने यासंदर्भातील बातमी दिली आहे.

एनडीआरएफच्या जवानांचे हे धाडस असामान्यच आहे असं म्हणावं लागेल. एनडीआरएफच्या जवानांना अशा परिस्थितीसाठी प्रशिक्षित केले जाते. पण, आपला जीव धोक्यात घालण्याचे साहज हे प्रशिक्षण घेऊन मिळत नसतं. यासाठी मनात दुसऱ्यांबद्दल प्रेमच असायला लागतं. मात्र, जवानांनी दाखवलेलं धाडस सामान्य नागरिकांनी दाखवू नये असं आवाहन केलं जात आहे.

व्हिडिओमध्ये दिसतंय की, नदीच्या पाण्याचा प्रवाह जोराचा आहे. त्यात एक भाविक वाहून जात आहे. अशावेळी जवान नदीच्या या जोराच्या वाहत्या प्रवाहात उडी घेतात. पोहोत बुडणाऱ्या व्यक्तीच्या जवळ जातात आणि पुढे जाऊन किनारा गाठतात. एनडीआरएफच्या जवानांनी वाचवलं नसतं त्या तरुणाचा जीव वाचणे अवघड होते. त्यामुळेच जवानांच्या धाडसाला सलाम केला जात आहे.