वॉशिंग्टन (पीटीआय) : लसीकरण प्रमाणपत्राबाबत परस्पर सहमतीने आंतरराष्ट्रीय प्रवास सोयीचा केला जावा, अशी अपेक्षा पंतप्रधान नरेंद्र मोदी यांनी व्यक्त केली. विदेशी नागरिकांना आपल्या देशात प्रवेश देण्याबाबत विविध देशांचे वेगवेगळे नियम असल्याच्या पार्श्वभूमीवर मोदींनी ही अपेक्षा व्यक्त केली आहे.

अमेरिकेचे अध्यक्ष ज्यो बायडेन यांनी आयोजित केलेल्या जागतिक कोविड परिषदेत पंतप्रधान मोदींनी व्हिडिओद्वारे सहभाग घेतला होता. ‘भारतात लसीकरण मोहिमेला वेग आला असून आम्ही उत्पादन क्षमताही वाढवत आहोत. इतर देशांनाही अधिक प्रमाणात लस पुरवठा करण्यासाठी जागतिक पुरवठा साखळी सर्वांसाठी खुली करणे आवश्‍यक आहे. जागतिक साथीमुळे झालेल्या आर्थिक परिणामांकडेही लक्ष द्यायला हवे.

एकमेकांच्या लसीकरण प्रमाणपत्राला मान्यता देऊन आंतरराष्ट्रीय प्रवास सोयीचा करता येईल,’ असे मोदी यांनी त्यांच्या व्हिडिओद्वारे केलेल्या भाषणात सांगितले. विदेशी प्रवाशांसाठी नवे नियम जाहीर करताना ब्रिटनने ॲस्ट्राझेनेका लस घेतलेल्यांना प्रवेशासाठी मंजुरी दिली असली या यादीतून त्यांनी भारतातील प्रवाशांना वगळले आहे. यावरून सध्या दोन देशांमध्ये चर्चा सुरु आहे.
भारतातील लसीकरण मोहिमेची माहिती देताना मोदी यांनी सांगितले की,‘भारतात जगातील सर्वांत मोठी लसीकरण मोहिम राबविली जात आहे. आतापर्यंत २० कोटी भारतीयांचे लसीकरण पूर्ण झाले आहे. आम्ही आतापर्यंत ९२ देशांना लस पुरविली आहे.’