नवी दिल्ली - लोकसभा निवडणुकीपूर्वी इंधनाचे दर कमी करण्याच्या प्रश्नाला केंद्रीय मंत्री हरदीप सिंग पुरी यांनी शनिवारी उत्तर दिले. याविषयी त्यांना विचारले असता ते म्हणाले की, पुढील वर्षी होणाऱ्या लोकसभा निवडणुकीपूर्वी सरकार इंधनाचे दर कमी करणार हा गैरसमज आहे, हा दावा प्रसारमाध्यमांनी केला असून त्यात तथ्य नाही.

केंद्रीय गृहनिर्माण, शहरी व्यवहार आणि पेट्रोलियम तथा नैसर्गिक वायू मंत्री हरदीप सिंग पुरी यांनी माहिती दिली की, आंतरराष्ट्रीय किंमती, वाहतूक खर्च, शुद्धीकरण खर्च आणि कर यासारख्या अनेक घटकांच्या आधारावर इंधनाच्या किमती निर्धारित केल्या जातात. ते म्हणाले की, देशातील इंधनाचे दर सरकार या घटकांवरून निश्चित करते.

कोरोना महामारीनंतर 2022 मध्ये तेलाच्या किंमती वाढल्याचा संदर्भ देत हरदीप सिंग पुरी म्हणाले की, भारताने तेल पुरवठा करणाऱ्या देशांना किंमती कमी करण्यास सांगितले नाही. उलट सरकारने इंधनाच्या किंमती कमी करण्यासाठी उत्पादन शुल्कात कपात केली आहे.

"याशिवाय, भाजपशासित राज्यांमधील सरकारने इंधनावरील करात 8 रुपयांवरून 11 रुपयांपर्यंत कपात केल्याचं पुरी यांनी सांगितलं.