नाकावाटे दिल्या जाणाऱ्या कोरोना लशीला परवानगी देणारा चीन हा पहिला देश ठरला आहे. तिआन्जिनमधल्या कॅनसिनो बायोलॉजिक्स या कंपनीने ही नाकावाटे दिली जाणारी लस तयार केली आहे. यामुळे हाँगकाँगमध्ये आज सकाळी या कंपनीच्या शेअर्समध्ये १४.५ टक्क्यांची वाढ झाली आहे.

चीनच्या औषध प्रशासाने कॅनसिनोची Ad5-nCoV ही लस आपत्कालिन वापरासाठी बुस्टर डोस म्हणून वापरण्यास परवानगी दिली आहे. नाकावाटे दिली जाणारी ही पहिलीच कोरोना प्रतिबंधक लस आहे. या लसीमुळे पेशींची रोगप्रतिकारक्षमतेत वाढ होणार असून थेट स्नायूमध्ये इंजेक्शन न देताच ही लस सुरक्षा देणार आहे.

कोरोनाविरोधात अशा प्रकारे नाकावाटे दिल्या जाणाऱ्या आणखी लसींवर वैज्ञानिक संशोधन करत आहेत. कॅनसिनोकडून सुरुवातीला टोचली जाणारी लस कोरोनाविरोधात ६६ टक्के प्रभावी होती, तसंच गंभीर आजारांवर ९१ टक्के प्रभावी होती. मात्र त्यानंतर सिनोव्हॅक बायोटेक या कंपनीची लसही बाजारात आली. या दोन कंपन्यांनी जगभरात ७७० मिलियनहून अधिक लसी पाठवल्या.