नवी दिल्ली : ‘‘कर्नाटकमध्ये कॉँग्रेसच्या मंत्र्यांनी भ्रष्टाचारापासून दूर राहावे. मुख्यमंत्री सिद्धरामय्या यांनी कोणत्याही परिस्थितीमध्ये भ्रष्टाचाऱ्यांची गय करू नये,’’ अशी तंबी राहुल गांधींनी दिली आहे. लोकसभा निवडणुकीच्या तयारीसाठी आज कर्नाटकमधील पक्ष संघटना आणि राज्य सरकारच्या मंत्र्यांच्या बैठकीमध्ये राहुल गांधींनी ही तंबी दिली.

कॉँग्रेस मुख्यालयामध्ये झालेल्या बैठकीमध्ये पक्षाध्यक्ष मल्लिकार्जुन खर्गे, संघटना सरचिटणीस के. सी. वेणुगोपाल, प्रभारी सरचिटणीस रणदीप सुरजेवाला, मुख्यमंत्री सिद्धरामय्या, उपमुख्यमंत्री डी. के. शिवकुमार यांच्यासह राज्य सरकारमधील मंत्र्यांचा त्याचप्रमाणे पक्ष संघटनेतील नेत्यांचाही सहभाग होता.

राज्यात कॉँग्रेसचे सरकार सत्तेत आल्यानंतर लगेचच मंत्र्यांवर भ्रष्टाचाराचे आरोप सुरू झाले असून विकासकामांसाठी राज्य सरकारच्या खजिन्यात निधी नसल्याची टीका होत आहे. त्यापार्श्वभूमीवर राहुल गांधींनी भ्रष्टाचाराच्या मुद्द्यावर मंत्र्यांना फटकारले.

‘विधानसभा निवडणुकीमध्ये भाजपच्या भ्रष्टाचाराच्या मुद्द्यावरून मतदारांनी कॉँग्रेसला सत्ता सोपविली असल्याने मंत्र्यांवर आरोप झाल्यास तातडीने त्याची चौकशी करून कारवाई करावी,’ असेही राहुल गांधींनी या बैठकीत सांगितले.

या बैठकीनंतर कर्नाटक प्रदेश कॉँग्रेसचे कार्यकारी अध्यक्ष सलीम अहमद पत्रकारांशी बोलताना म्हणाले की, ‘‘सिद्धरामय्या सरकारने पाच गॅरंटी आश्वासनांपैकी चार गॅरंटी योजना पूर्ण केल्या आहेत. राज्यसरकारच्या कामगिरीमुळे लोकसभा निवडणुकीत कॉँग्रेस पक्ष कर्नाटकमध्ये २० हून अधिक जागा जिंकेल.’’