छत्रपती संभाजीनगर : राज्य शिक्षण मंडळाच्या वतीने घेण्यात आलेल्या बारावी परीक्षेत भौतिकशास्त्र विषयाच्या ३७२ उत्तरपत्रिकांचे प्रकरण आता पोलिसांकडे वर्ग झाले आहे. बोर्डाच्या वतीने पोलिसांमध्ये दोन अध्यापकांविरुद्ध फर्दापूर पोलिस ठाण्यात गुन्हा देखील नोंदविण्यात आला होता. गुन्हा दाखल होताच दोन्ही अध्यापक फरार झाले आहेत. पोलिस त्यांचा शोध घेत आहेत.

बारावीच्या परीक्षेतील भौतिकशास्त्र विषयाच्या अंबाजोगाई (जि. बीड), कळमनुरी (ता.हिंगोली) येथील उत्तरपत्रिका सोयगाव तालुक्यातील राजकुंवर कनिष्ठ महाविद्यालयाचे अध्यापक राहुल उसारे व अध्यापिका मनीषा शिंदे यांच्याकडे तपासण्यासाठी देण्यात आल्या होत्या.

या उत्तरपत्रिका तपासल्यानंतर यामध्ये अक्षर बदल असल्याची तक्रार देखील बोर्डाकडे केली नव्हती. त्यानंतर उत्तरपत्रिकांची फेरतपासणी करत असताना ही बाब मॉडरेटरच्या लक्षात आली. त्यामुळे बोर्डामार्फत यासंदर्भात एक तपासणी समिती गठित केली.

चौकशीअंती उत्तरपत्रिका छेडछाड प्रकरणात बोर्डाने फर्दापूर (ता. सोयगाव) पोलिस ठाण्यात राहुल उसारे व अध्यापिका मनीषा शिंदे या दोन अध्यापकांसह एका अज्ञांतावर फसवणुकीचा गुन्हा दाखल केला. मात्र, गुन्हा दाखल झाल्याची माहिती मिळताच संबंधित दोन्ही अध्यापक फरार झाले. आता ३७२ विद्यार्थ्यांची पोलिसांकडून चौकशी केली जाणार आहे.