याआधी लिहिलेल्या लेखामध्ये काही व्यवस्थापकीय कौशल्याचा उल्लेख केला होता. त्याबद्दल थोडं विस्तृत लिहिण्याचा प्रयत्न करतो. 

वृद्धिधिष्ठीत मानसिकता ठेवायची असल्यास एक कौशल्य अंगात बाणवावं लागतं आणि ते म्हणजे अनलर्निंग. माणूस या आयुष्यभराचा विद्यार्थी असतो हे आपण लहानपणी शिकलेलो असतो. पण नंतर येणाऱ्या काळाच्या ओघात हे आपण विसरून जातो. आस्थापनेत आपली पत वरती जायला सुरुवात होते, त्यावेळेस असणारा आपल्या नॉलेज बेसला आपण घट्ट चिकटून बसतो. ते नैसर्गिक सुद्धा आहे. कारण त्या माहितीच्या आधारावर आपण स्वतःला प्रस्थापित केलेलं असतं. तिथं आपल्याला खूप सुरक्षित वाटत असतं. त्या कारणामुळं नॉलेज, माहिती ज्यावर आपलं तथाकथित प्रभुत्व असतं ते  सहजासहजी सोडायला तयार नसतो. त्या आणि त्याच कारणामुळं आपण ती माहिती दुसऱ्याला देत नाही, विसरणं तर फार लांबची गोष्ट. या मानसिकतेचा तोटा म्हणजे आपल्या मेंदूचा सीपीयू फक्त त्या माहितीने किंवा रूढार्थाने त्याला ज्ञान म्हणतात, व्यापलेला असतो. जगामध्ये चालू असणाऱ्या नवीन गोष्टीचा अंगीकार करण्यासाठी, त्या शिकण्यासाठी आपला मेंदू हा तयारच नसतो. आपल्या प्रचलित म्हणीप्रमाणे बेडकाला ते छोटं डबकं म्हणजे समुद्र वाटायला लागतो आणि आपल्या वृद्धीला आपण स्वतःच एक  अडसर तयार करतो. 

प्रक्रिया अनलर्निंगची

अनलर्निंग ही प्रोसेस फार भारी आहे. त्याचा अर्थ असा नाही, की शिकलेलं विसरून जायचं. तर एकदा त्या माहितीवर, किंवा एखाद्या प्रोसेसवर प्रभुत्व मिळवल्यावर ते नॉलेज दुसऱ्याला पास ऑन करायचं. रिले रेसमध्ये कसं आपण बॅटन समोरच्या खेळाडूच्या हातात देतो आणि निश्चिंत होतो, तसं व्यावसायिक ज्ञान, माहिती, पद्धती या दुसऱ्याच्या खांद्यावर टाकता यायला हव्यात. अर्थात, हे करताना तितके सक्षम खांदे पण तयार करायला हवेत. एकदा ते केलं तर आजकालच्या भाषेमध्ये, मेंदूच्या सीपीयूमधून सगळं काही डाऊनलोड होतं आणि तो नवीन काही आव्हान स्वीकारण्यासाठी सज्ज होतो. यामध्ये गंमत अशी, की वृद्धिधिष्ठित मानसिकता म्हणजे श्रीमंती वाढवणे इतक्यापर्यंतच व्याख्या मर्यादित आहे. इतर लौकिक जगासाठी असेलही ते कदाचित, पण व्यावसायिक आणि उद्योजकतेच्या जगात मात्र ही मानसिकता नवनवीन आव्हानं स्वीकारून, त्यावर काम करत सोल्यूशन काढणं आणि दुर्दैवानं काही कारणानं अपयश आलं तर हा मार्गच चुकीचा आहे असा अर्थ न काढता, आपल्या पद्धतीमध्ये काहीतरी चुकलं आहे याचा स्वीकार करणं आणि ते दुरुस्त करत पुन्हा नव्यानं त्या किंवा दुसऱ्या आव्हानाला सामोरं जाणं, हे आहे. आणि इथं आपल्याला लक्षात येते ती म्हणजे अनलर्निंगची पुढची पायरी आणि ती म्हणजे रिलर्निंग. जे म्हणून आपण नवीन काम हातामध्ये घेतलं आहे ते तडीला नेण्यासाठी काहीतरी पद्धती ही आपल्याला नव्याने शिकावी लागते, त्यावर पुन्हा शून्यापासून काम करावं लागतं. तेव्हा कुठं ज्याला व्यवस्थापकीय भाषेत ‘इन्क्लुजिव्ह ग्रोथ’ होण्याची शक्यता तयार होते.

अगदी शब्दाचे खेळ करत सांगायचं झालं, तर...

• लर्निंग (शिक्षण, माहिती, ज्ञान)

• अनलर्निंग (मिळालेलं शिक्षण विसरणं नव्हे, तर हे दुसऱ्याच्या सक्षम खांद्यावर सोपवणं)

• रिलर्निंग (पुनःशिक्षण) ही अर्निंगची (कमाई) अत्यंत शाश्वत पद्धत आहे, हे एव्हाना अनेक उदाहरणांवरून सिद्ध झालं आहे.