पुणे : सावित्रीबाई फुले पुणे विद्यापीठाच्या प्र-कुलगुरू नियुक्ती वादात सापडण्याची शक्यता आहे. नवनियुक्त प्र-कुलगुरू डॉ. पराग काळकर यांच्यावर काँग्रेसने आक्षेप घेतला असून, विधानसभेचे विरोधी पक्षनेते विजय वडेट्टीवार यांनी ही नियुक्ती रद्द करण्याची मागणी केली आहे.

गुन्हेगारी पार्श्वभूमी असलेल्या व्यक्तींची नियुक्ती होत असेल तर हे अतिशय गंभीर असल्याचे त्यांनी म्हटले आहे. डॉ. काळकर यांच्या नियुक्तीनंतर दुसऱ्याच दिवशी वडेट्टीवार यांनी त्यावर आक्षेप घेतला आहे.

त्यांनी याबाबत ट्विट करत म्हटले आहे,‘‘ऑक्सफर्ड ऑफ द ईस्ट असा नावलौकिक असलेल्या सावित्रीबाई फुले पुणे विद्यापीठाच्या प्र - कुलगुरू पदी गुन्हेगारी पार्श्वभूमी असलेल्या व्यक्तीची नियुक्ती करून नेमके काय साध्य करायचे आहे?

ही नियुक्ती राजकीय दबावातूनच झाली असून, ती तात्काळ रद्द करण्यात यावी. सावित्रीबाई फुले पुणे विद्यापीठाला ऐतिहसिक पार्श्वभूमी आहे. चरित्र जोपासने हे विद्यापीठाचे काम आहे.’’ डॉ. काळकर हे विद्यापीठाच्या वाणिज्य विभागाचे अधिष्ठाता होते. २०१७ ते १८ या कालावधीत त्यांनी आर्थिक गुन्हे केले होते.

पिंपरी चिंचवड येथील पोलीस ठाण्यात गंभीर स्वरुपाचे गुन्हे त्याच्यांवर दाखल आहेत. असे असताना कुठलीही शहानिशा न करता, ही नियुक्ती कशी झाली? हा गंभीर प्रश्न आहे. अशाच नियुक्त्या करायच्या असतील तर संपूर्ण प्रक्रिया राबविण्याची गरजच काय? राजकीय नियुक्त्या असतील तरी थोडी खातरजमा करून त्या केल्या जाऊ शकतात. पण, अशा नियुक्त्या करून आपण जनतेला काय संदेश देऊ इच्छितो?, असेही वडेट्टीवार यांनी म्हटले आहे.