India Pakistan Tensions : ‘ऑपरेशन सिंदूर’नंतर आता भारताचा पाकिस्तानला आणखी एक दणका!

Operation Deep Manifest: India’s Strategic Move After Operation Sindoor: पहलगामध्ये झालेल्या दहशतवादी हल्ल्यानंतर भारताने ऑपरेशन सिंदूर राबवून दहशतवाद्यांना आणि पाकिस्तानला जबरदस्त तडाखा दिला होता. भारतीय हवाई दलाच्या अचूक हल्ल्यांनी पाकिस्तानमधील दहशतवाद्यांचे अड्डे उद्ध्वस्त केले गेले होते. त्यानंतर आता भारत पाकिस्तानविरुद्ध आणखी एक ऑपरेशन चालवत आहे, ज्याचे नाव 'ऑपरेशन डीप मॅनिफेस्ट' आहे.

सरकारने पाकिस्तानातून येणारा माल रोखण्यासाठी कडक मोहीम सुरू केली आहे. या अंतर्गत, महसूल गुप्तचर संचालनालयाने (DRI) 'ऑपरेशन डीप मॅनिफेस्ट' अंतर्गत १२.०४ कोटी रुपयांचा पाकिस्तानी बनावटीचा माल जप्त केला आहे. हा माल थेट पाकिस्तानातून भारतात आणला जात नव्हता, तर तिसऱ्या देशांद्वारे आणला जात होता.

अर्थ राज्यमंत्री पंकज चौधरी यांनी संसदेत सांगितले की, जुलै २०२५ पर्यंत या कारवाईत एकूण ५ गुन्हे दाखल झाले आहेत. या प्रकरणांमध्ये पाकिस्तानमध्ये बनवलेल्या वस्तूंची किंमत १२ कोटी ४ लाख रुपये आहे. सर्व प्रकरणांमध्ये, माल संयुक्त अरब अमिराती (UAE) मार्गे भारतात आणला जात होता.

पहलगाम दहशतवादी हल्ल्यानंतर पाकिस्तानातून होणाऱ्या सर्व आयातीवर पूर्ण बंदी घालण्यात आली, तेव्हा सरकारने ही कारवाई सुरू केली. या कारवाईचा उद्देश तिसऱ्या देशांमधून पाकिस्तानच्या येणाऱ्या वस्तूंची तस्करी थांबवणे आहे.

याशिवाय केंद्रीय मंत्र्यांनी अशी माहिती दिली की,  सीमाशुल्क अधिकाऱ्यांनी १३ प्रकरणांमध्ये १२ लाख किमतीची बेकायदेशीर आयात देखील पकडली आहे. यामध्ये २ मे रोजीच्या डीजीएफटीच्या अधिसूचनेसह अनेक कायदेशीर नियमांचे उल्लंघन करण्यात आले. तर यापूर्वी २६ जून रोजी सरकारने ३९ कंटेनरमध्ये १११५ मेट्रिक टन माल जप्त केला होता, ज्याची किंमत सुमारे ९ कोटी रुपये होती. या प्रकरणात, एका आयात कंपनीच्या भागीदारालाही अटक करण्यात आली होती.

तपासात असे दिसून आले आहे की माल प्रथम पाकिस्तानमधील कराची बंदरातून दुबईला पाठवण्यात आला होता, जिथे तो वेगवेगळ्या कंटेनरमध्ये ठेवून भारतात पाठवण्यात आला होता. हा माल दुबईतील जेबेल अली बंदर येथून भारतीय बंदरांवर नेण्यात आला होता.