नवी दिल्ली : सध्या जम्मू आणि काश्मीरमध्ये (Jammu Kashmir) सुरू असलेली मतदारसंघांच्या फेररचनेची प्रक्रिया पार पडल्यानंतर विधानसभेच्या निवडणुका घेण्यात येतील. राज्यातील स्थिती पूर्ववत होताच पूर्ण राज्याचा देखील दर्जा बहाल करण्यात येईल, अशी घोषणा गृहमंत्री अमित शहा (Amit Shah) यांनी आज केली. शहा यांच्या हस्ते आज पहिल्या जिल्हा सुशासन निर्देशांकाचे व्हर्च्युअली प्रकाशन पार पडले. त्यावेळी बोलताना ते म्हणाले की, पंतप्रधान मोदी यांनी नेहमीच जम्मू- काश्मीरला प्राधान्य दिले आहे.(Jammu Kashmir Assembly Election)

या केंद्रशासित प्रदेशाची चौफेर प्रगती आणि विकास व्हावा म्हणून देखील प्रयत्न केले जात आहे. लोकशाही प्रक्रियेचा विचार करता फेररचनेची प्रक्रिया सुरू झाली असून ही प्रक्रिया पूर्ण होताच राज्यात विधानसभेच्या निवडणुका घेण्यात येतील. अनेक लोक वेगवेगळ्या गोष्टी सांगत आहेत. मी संसदेमध्ये देखील जम्मू- काश्मीरला पूर्ण राज्याचा दर्जा देण्यात येईल अशी हमी दिली आहे. फक्त त्यासाठी राज्यातील स्थिती पूर्ववत होणे गरजेचे आहे.

केवळ लोकशाहीच्या माध्यमातून जम्मू आणि काश्मीरचा विकास होऊ शकतो, यातूनच लोक सुखी- समाधानी होतील. लोकशाहीमुळे तरुणांना रोजगार मिळतील.

- अमित शहा, गृहमंत्री