नाश्त्यासाठी काय कराव? रोज रोज या मुलांच्या डब्याला काय द्यायचं? अने अनेक प्रश्न गृहिणींच्या मनात सकाळी सकाळी रेंगाळत असतात. रोज पोहे, उपीट असा नाश्ता करुन कंटाळला असाल तर आजच ट्राय करा कोकणातील घावणे. लहान मुलांपासून ते मोठ्यांपर्यंत घावणे अन् चटणी अतिशय आवडीने खातात. म्हणून तुमच्यासाठी घेऊन आलो आहे घावण्याची रेसिपी.

घावणे हे खुप कमी कालावधीत होतात. इतकचं नव्हे तर याला फारसं साहित्यदेखील लागत नाही. घावणे हा पौष्टीक पदार्थ आहे. २ - ३ घावणे खाल्ल्याने पोट टम्म भरते.

साहित्य

तांदळाचं पीठ

मीठ

पाणी

चटणीसाठी लागणार साहित्य

ओलं खोबर

लसणाच्या 2 किंवा 3 पाकळ्या

चणा डाळ

हिरवी मिरची (तिखटानुसार)

मीठ चवीनुसार

आणि फोडणीसाठी कढीपत्ता , तेल, मोहरी

कृती

प्रथम चटणी करुन घेऊ. ओलं खोबर, लसणाच्या 2 किंवा 3 पाकळ्या, चणा डाळ, हिरवी मिरची(तिखटानुसार), मीठ चवीनुसार मिक्सरमध्ये बारीक करुन घेऊ. त्यानंतर चटणीला फोडणी देण्यासाठी प्रथम तेल गॅसवर तापत ठेवा. त्यानंतर त्यामध्ये मोहरी कढी पत्ता अशी चटणीसाठी फोडणी तयार करा. मग झाली तुमची चटणी.

घावणे कसे बनवाल?

गॅसवर लोखंडी तवा लो प्लेमवर गरम करायला ठेवा. दुसरीकडे एका मोठ्या बाऊलमध्ये एक वाटी तांदळाचं पीठ घ्या. त्यात १ वाटी पाणी घालून मिक्स करा. व त्यानंतर थोडं - थोडं करून आणखी एक वाटी पाणी घालून मिश्रण मिक्स करा. पीठ तयार करताना पीठाच्या गाठी तयार होणार नाही याची काळजी घ्या

मिश्रण तयार झाल्यानंतर त्यात चवीनुसार मीठ घालून बॅटर तयार करा. पीठ तयार झाल्यानंतर गॅस हाय फ्लेमवर ठेवा, व तव्यावर ब्रशने किंवा अर्धा कांदा कापून त्याने तेल ग्रीस करा. आता एका छोट्या वाटीने बॅटर ढवळून तव्यावर घावण तयार करा.

त्यावर झाकण ठेऊन १० ते १५ सेकंद वाफ द्या. १५ सेकंद झाल्यानंतर झाकण काढून गॅस मध्यम आचेवर करून घावण पलटी करा, व दोन्ही बाजूने भाजून घ्या. अशा प्रकारे मऊ - लुसलुशीत जाळीदार घावणे खाण्यासाठी रेडी.