कोडोली : कोडोली (ता. पन्हाळा) येथे सार्वजनिक गणेश विसर्जन मिरवणुकीसमोर (Ganpati Visarjan Miravnuk) सुतळी बॉम्ब उडत का नाही हे पाहण्यास गेलेला तरुण अचानक बॉम्ब उडून डोळ्याला व डोक्याला गंभीर दुखापत झाल्याने जखमी झाला. भारत संभाजी चव्हाण (वय २८, रा. देवाळे, ता. पन्हाळा) असे त्याचे नाव आहे.

या तरुणाला आपला उजवा डोळा गमवावा लागला. ही घटना गुरुवारी रात्री दहा वाजण्याच्या दरम्यान घडली. याबाबत घटनास्थळावरून मिळालेली माहिती अशी, कोडोली येथे गुरुवारी गावातील सार्वजनिक गणेश मंडळाच्या विसर्जन मिरवणुका सुरू होत्या. देवाळे येथील भारत चव्हाण कोडोलीत आपल्या सासुरवाडीत कुटुंबासोबत गणेश विसर्जन मिरवणूक पाहण्यासाठी आला होता.

आठ वाजण्याच्या दरम्यान एका मंडळाने लोखंडी पाईपमध्ये सुतळी बॉम्ब लावला होता, तो बराच वेळ उडाला नसल्याने बॉम्ब उडत का नाही म्हणून पाहण्यास भारत गेला असता अचानक बॉम्ब उडला. यामुळे त्याच्या उजव्या डोळ्याला व डोक्याला मोठी दुखापत होऊन तो रक्तबंबाळ होऊन जमिनीवर बेशुद्ध अवस्थेत पडला.

छत्रपती शिवाजी चौक ते रुग्णालयापर्यंत असे अर्धा किलोमीटर खांद्यावर उचलून मंडळाच्या कार्यकर्त्यांनी पळवत नेऊन चव्हाण याला यशवंत धर्मार्थ रुग्णालयात दाखल केले. प्रकृती गंभीर झाल्याने त्याला तातडीने कोल्हापूर येथील खासगी रुग्णालयात दाखल केले.