वॉशिंग्टन : अमेरिकेची ‘अपोलो आठ’ या अंतराळ मोहिमेतील अंतराळवीर निवृत्त मेजर जनरल विल्यम अँडर्स (वय ९०) यांचे शुक्रवारी (ता.७) रात्री विमान अपघातात निधन झाले. मानवाला चंद्राच्या कक्षात घेऊन जाणाऱ्या या मोहिमेत सहभागी झालेल्या अँडर्स यांनी १९६८ मध्ये अवकाशातून काढलेले निळसर रंगातील पृथ्वीचे छायाचित्र गाजले होते.

ते काल खासगी विमानातून जात होते. वॉशिंग्टन राज्यातील सँड जुआन बेटावरील पाण्यात विमान पडले. या दुर्घटनेत अँडर्स यांचा मृत्यू झाल्याची माहिती त्यांचा मुलगा हवाई दलातील लेफ्टनंट कर्नल ग्रेग अँडर्स यांनी दिली. शोध पथकाने अँडर्स यांचा मृतदेह बाहेर काढला. अमेरिकेचे मध्यवर्ती हवाई वाहतूक प्रशासन विमान दुर्घटनेचा तपास करीत आहेत.