काबूल - अफगाणिस्तानच्या काबूल विमानतळावर (kabul airport rush) प्रचंड गर्दी उसळली आहे. तिथे सुरु असलेल्या गोंधळामध्ये (chaos) पाच जणांचा मृत्यू झाल्याचे वृत्त आहे. अफगाणिस्तानच्या (Afganistan) हमीद करझाई आंतरराष्ट्रीय विमानतळावर (Hamid Karzai Airport) अत्यंत भयावह स्थिती आहे. तालिबानच्या (Taliban) हाती सत्ता आल्यामुळे देशाबाहेर जाण्यासाठी अफगाणि नागरिकांनी काबूल विमानतळावर (kabul airport) एकच गर्दी केली आहे.

विमान पकडण्यासाठी, विमानात प्रवेश मिळवण्यासाठी अक्षरक्ष: चेंगराचेंगरी सुरु आहे. पाच जणांचे मृतदेह आपण गाडीतून नेताना पाहिल्याचे एका प्रत्यक्षदर्शीने सांगितेल. रॉयटर्सने हे वृत्त दिले आहे. गोळीबार कि, चेंगराचेंगरीमध्ये मृत्यू झाला ते अजून स्पष्ट झालेले नाही, असे दुसऱ्या प्रत्यक्षदर्शीने सांगितले. या मृत्यूबद्दल अधिकाऱ्यांनी अजूनपर्यंत कोणतीही माहिती दिलेली नाही.

हमीद करझाई विमानतळावरुन व्यावसायिक, प्रवासी विमानांची उड्डाणे बंद करण्यात आली आहेत. विमानतळावर लुटमार रोखण्यासाठी हा निर्णय घेण्यात आल्याची माहिती काबूल विमानतळ प्राधिकरणाकडून देण्यात आली आहे. अफगाणिस्तानची हवाई हद्द टाळण्यासाठी एअर इंडियाचे शिकागो-दिल्ली विमानाचा मार्ग बदलण्यात आला आहे. मार्ग बदलण्यात आलेल्या दिल्लीला येणाऱ्या या विमानात यूएई किंवा दोहा विमानतळावर इंधन भरण्यात येईल.