रिओ दि जानेरो : जगातील चौथ्या क्रमांकाची सर्वांत मोठी लोकशाही म्हणून ओळखल्या जाणाऱ्या ब्राझीलमध्ये अध्यक्षपदाच्या लढतीला आता आणखी अटीतटीचे रूप प्राप्त झाले आहे. अध्यक्षीय निवडणुकीसाठी रविवारी ९८.८ टक्के एवढ्याच मतांची मोजणी होऊ शकली त्यामध्ये माजी अध्यक्ष डाव्या ‘वर्कर पार्टी’चे लुईस इन्सिओ लुला डा सिल्वा यांना ४८.१ टक्के एवढी मते पडली तर त्यांचे प्रतिस्पर्धी आणि विद्यमान अध्यक्ष तसेच ‘लिबरल पार्टी’चे जेर बोल्सोनॅरो यांना ४३.५ टक्के लोकांचा पाठिंबा मिळाला आहे. आता दुसऱ्या टप्प्यातील मतमोजणी पार पडल्यानंतर विजयी उमेदवारांची घोषणा करण्यात येईल, असे निवडणूक अधिकाऱ्यांनी सांगितले.

या निवडणुकीसाठी अन्य नऊ उमेदवार देखील मैदानात उतरले होते पण ते बोल्सोनॅरो आणि डा सिल्वा यांच्यासमोर टिकू शकले नाहीत. तत्पूर्वी मतदानपूर्व चाचण्यांचा कल हा डा सिल्वा यांच्याच बाजून होता. बोल्सोनॅरो यांना साउपावलो, रिओ दि जानेरो आणि मिनास गेरियास आदी भागांतून मोठा पाठिंबा मिळाला असला तर येथील त्यांची मते मात्र वाढलेली नाहीत. बोल्सोनॅरो हे नेहमीच चिथावणीखोर भाषणांमुळे चर्चेत राहात होते. त्यांच्याकाळात लोकशाहीवादी संस्थांना मोठ्या कसोटीला सामोरे जावे लागले होते, कोरोना काळात अत्यंत चुकीच्या पद्धतीने हाताळलेली परिस्थिती आणि अॅमेझॉनच्या जंगलातील बेसुमार वृक्षतोडआदी कारणांमुळे बोल्सोनॅरो यांच्याविरोधात मोठा जनक्षोभ पाहायला मिळतो आहे. पण याच बरोबर त्यांनी स्वतःची कट्टर राष्ट्रवादी नेता अशी ओळख निर्माण केली आहे.

सिल्वांवर भ्रष्टाचाराचा ठपका

डासिल्वा यांच्या काळामध्ये ब्राझीलमध्ये अनेक महत्त्वपूर्ण आर्थिक योजनांची अंमलबजावणी करण्यात आली होती. २००३ ते २०१० या काळामध्ये त्यांनी राबविलेल्या गरिबी निर्मुलन कार्यक्रमाचा लाखो लोकांना फायदा झाला आणि ते मध्यमवर्गामध्ये आले. त्यांच्या कार्यकाळामध्ये भ्रष्टाचार वाढल्याने त्यांना पायउतार व्हावे लागले होते. खुद्द डा सिल्वा यांना एका भ्रष्टाचाराच्या प्रकरणामध्ये १९ महिन्याचा तुरूंगवास झाला होता.