बीजिंग : रशिया हा चीनचा सर्वांत महत्त्वाचा व्यूहात्मक भागीदार देश असल्याचे चीनचे परराष्ट्र मंत्री वँग यी यांनी आज स्पष्ट केले. रशियाने युक्रेनवर केलेल्या आक्रमणानंतर अनेक देश रशियावर निर्बंध घालत असताना चीन मात्र ठामपणे रशियाच्या साथीला उभा राहिला आहे.

रशियावर निर्बंध घालण्याच्या पाश्‍चिमात्य देशांच्या निर्णयाला चीनने विरोध केला आहे. याबाबत पत्रकारांशी बोलताना वँग यी म्हणाले की,‘‘निर्बंध घातल्याने नवीन समस्या निर्माण होतात. आम्ही रशियावर निर्बंध घालणार नाहीत. तो देश आमचा सर्वांत महत्त्वाचा व्यूहात्मक भागीदार देश आहे. आंतरराष्ट्रीय पातळीवर कितीही कठिण परिस्थिती निर्माण झाली तरीही चीन आणि रशिया यांची भागीदारी कायम राहिल.’’ रशियाने युक्रेनवर केलेल्या आक्रमणानंतर संयुक्त राष्ट्र आणि सुरक्षा समितीमध्ये मांडल्या गेलेल्या सर्व ठरावांवेळी चीनने तटस्थ भूमिका स्वीकारली होती.

रशियाचे अध्यक्ष व्लादीमिर पुतीन आणि चीनचे अध्यक्ष शी जिनपिंग यांनी यांची चार फेब्रुवारीला भेट झाली होती. त्यानंतर त्यांनी संयुक्त निवेदन प्रसिद्ध करत दृढ संबंधांवर शिक्कामोर्तब केले होते. तैवान हा चीनचाच भाग असल्याच्या चीन सरकारच्या दाव्याचे रशियाने समर्थन केले आहे. तर, चीनने ही ‘नाटो’ संघटनेचा विस्तार होऊन त्यात युक्रेन आणि पूर्व युरोपातील इतर काही देशांचा त्यात समावेश करण्यास विरोध दर्शविला आहे.