काल ऑस्करच्या 94 व्या अकादमी पुरस्कारांचे वितरण करण्यात आले. मात्र, हा सोहळा गाजला आहे तो वेगळ्याच कारणांनी... या सोहळ्याचे निवेदन करणारा कॉमेडियन ख्रिस रॉक याला अभिनेता विल स्मिथने (Will Smith) मंचावर जाऊन थप्पड मारली होती. विल स्मिथला यंदाचा सर्वोत्कृष्ट अभिनेत्याचा पुरस्कार प्राप्त झाला आहे. मात्र, या थप्पडीचा ख्रिस रॉकला (Chris Rock) फायदाच झाला असल्याचं दिसून येतंय कारण, त्याचा आगामी कॉमेडी शो सध्या तुफान हाऊसफुल्ल झाला आहे. त्याच्या आगामी स्टँड-अप शोसाठीच्या तिकीट विक्रीमध्ये विक्रमी वाढ होत आहे.

व्हरायटी, टिकपिक या दुय्यम तिकीट विक्री करणाऱ्या कंपन्यांनी काल ही घटना घडल्यानंतर गेल्या एका महिन्यात जेवढी तिकीट विक्री केली नाही, तेवढी विक्री काल एका दिवसांत केली आहे. कंपनीने दावा केला आहे की रविवारी रात्रीपासून तिकिटांच्या किमतीही वाढल्या आहेत. 18 मार्चला 46 डॉलर असणारी तिकीटाची किंमत आज 341 डॉलरवर जाऊन पोहोचली आहे. रॉक विल्बर थिएटरमध्ये बुधवार, गुरुवार आणि शुक्रवारी बॅक टू बॅक शो सादर करणार आहे.

काल सोहळ्यात नेमकं काय घडलं?

विल स्मिथला यावर्षी ‘किंग रिचर्ड’साठी नामांकन मिळाले होते. या चित्रपटासाठी त्याला सर्वोत्कृष्ट अभिनेत्याचा ऑस्कर पुरस्कार मिळाला आहे. क्रिस रॉक सर्वोत्कृष्ट माहितीपटाचा पुरस्कार सादर करण्यासाठी मंचावर आला होता. त्यावेळी त्याने विल स्मिथच्या पत्नीवर एक विनोद केला. त्यानंतर विल स्मिथने स्टेजवर जाऊन त्याला कानाखाली मारल्याचं दिसून आलं. कॉमेडियन क्रिसने विल स्मिथची पत्नी जॅडाच्या आजारपणाची खिल्ली उडवली होती, जी त्याला आवडली नाही. मात्र, त्यानंतर विल स्मिथने घडल्या प्रकाराबद्दल माफी मागितली आहे.