तेहरान : ‘आमच्या अस्तित्वाला धोका निर्माण झाल्यास आम्ही आमचे अणुधोरण बदलू,’ असे म्हणत इराणने आज इस्राईलवर अणुहल्ला करण्याचा अप्रत्यक्ष इशारा दिला. इराणच्या या इशाऱ्यामुळे पश्‍चिम आशियातील आधीपासूनच असलेल्या संघर्षग्रस्त वातावरणातील तणाव वाढला आहे.

इराण आणि इस्राईल या देशांनी एकमेकांवर एकमेकांवर थेट हल्ले केल्यानंतर दोन्ही देशांमधील शत्रुत्वाला आणखी धार आली आहे. केवळ शांततेसाठी अणुशक्तीचा वापर करण्याचे इराणचे धोरण आहे.

त्याच अटीवर त्यांच्यावरील अनेक निर्बंध हटविण्यात आले होते. मात्र, इस्राईल-हमास युद्धापासून तणाव वाढला आहे. इराणचे सर्वोच्च नेते अयातुल्ला अली खामेनी यांचे सल्लागार कमाल खाराझी यांनी रविवारी एका वाहिनीला मुलाखत देताना अणुधोरण बदलण्याचा इशारा दिला.

ते म्हणाले,‘‘अणुबाँब तयार करण्याबाबत आम्ही अद्याप निर्णय घेतलेला नाही. मात्र, आमच्या अस्तित्वालाच धोका निर्माण झाल्यास तसा निर्णय घेण्याशिवाय गत्यंतर उरणार नाही.’’