अमेरिकेपाठोपाठ आता युरोपमध्ये भारतीय नागरिकावर वर्णद्वेषी टिप्पणी केल्याचा प्रकार समोर आला आहे. या घटनेसंबधीचा एक व्हिडिओ सोशल मीडियावर मोठ्या प्रमाणावर व्हायरल होत असून, वाढत्या वर्णद्वेषांच्या घटनांमुळे भारतीयांमध्ये संतप्त भावना व्यक्त केल्या जात आहे.

व्हायरल होणाऱ्या या व्हिडिओमध्ये स्वतःला यूएसचा नागरिक म्हणवणारा व्यक्ती भारतीय व्यक्तीला पैरासाइट (परजीवी) आणि जेनोसाइडर (नरसंहार करणारा ) असं संबोधताना दिसून येत आहे. पोलंडमधील या व्हिडिओमध्ये दिसणाऱ्या भारतीय नागरिकाची ओळख अद्याप पटलेली नसून, व्हिडिओमध्ये भारतीय व्यक्ती संबंधित व्यक्तीला विरोध करता दिसत आहे. तसेच तु हा व्हिडिओ का बनवत आहे? असा प्रश्न भारतीय नागरिक या व्यक्तीला विचारता ऐकू येत आहे. दरम्यान या दोन व्यक्तीमध्ये नेमका वाद कोणत्या कारणामुळे झाला याचं नेमकं कारण समोर आलेले नाही. तसेच या प्ररकरणी अद्यापर्यंत कोणतीही तक्रार दाखल करण्यात आलेली नाही.

पोलंड फक्त पोलिश लोकांसाठी

हा व्हिडीओ बनवणारा अमेरिकन नागरिक तुम्ही आमच्या जातीचा नरसंहार करत आहात, तुम्ही पोलंडमध्ये का आहात? असा प्रश्न विचारत असून तुम्ही आमच्या पोलंडवर आक्रमण करू शकता असे तुम्हाला वाटते का? तुमचा स्वतःचा देश आहे, तुम्ही तिथे का जात नाही? असा सवाल करत पोलंड फक्त पोलिश नागरिकांसाठी असून तुम्ही पोलिश नसल्याचे म्हणत आहे.