दुबई : इराणने ब्रिटनचे ऑईल टँकर व काही जहाजे जप्त केल्याने तणावामध्ये वाढ झाली आहे. होरमुज खाडीक्षेत्रामध्ये इराणने जहाजे जप्त केल्याने वाद वाढण्याची चिन्हे आहेत.

इराणच्या सुरक्षा यंत्रणांनी ब्रिटनचे एक तेलवाहू टँकर आणि काही मालवाहू जहाजे जप्त केली आहेत. ब्रिटनच्या अधिकाऱ्यांनी याबाबत ही माहिती दिली. इराणचे रिव्होल्यूशनरी गार्डनी ही कारवाई केली. युकेचा झेंडा असलेले स्टेना इम्पेरो या तेलवाहू जहाजाला आंतरराष्ट्रीय सीमेमध्ये असताना हेलिकॉप्टर आणि चार जहाजांच्या मदतीने घेरण्यात आले. यानंतर या जहाजावर ताबा घेण्यात आला. या टँकरमध्ये एकूण 23 कर्मचारी असून यामध्ये एका भारतीय नागरिकही आहे.

इराणच्या गार्डनी त्यांच्या वेबसाईटवरही ही माहिती दिली आहे. यामध्ये सांगितले की, या जहाजाला आंतरराष्ट्रीय जलमार्ग कायदे न पाळल्याने जप्त करण्यात आले आहे. या जहाजाला इराणच्या बंदरावर ठेवले जाणार आहे. ब्रिटनचे सरकार किंवा जहाजाच्या कंपनीचा अद्याप जहाजाशी संपर्क झालेला नाही. इराणने जर लवकरात लवकर जहाज सोडले नाही तर याचे गंभीर परिणाम भोगावे लागतील. आमचे राजदूत इराणसोबत संपर्कात आहेत, असे ब्रिटनच्या मंत्र्यांनी म्हटले आहे.