मेटाचे सीईओ मार्क झुकरबर्ग आणि टेस्लाचे फाउंडर इलॉन मस्क हे आता थेट रिंगणात एकमेकांना भिडण्याची शक्यता आहे. कारण, इलॉन (Elon Musk) यांनी दिलेलं चॅलेंज मार्कने स्वीकारलं आहे. इंटरनेटवर मोठ्या प्रमाणात त्यांच्या या लढाईची चर्चा सुरू आहे.

नेमकं काय आहे प्रकरण?

ट्विटरचे मालक इलॉन मस्क हे आपल्या विनोदी स्वभावासाठी प्रसिद्ध आहेत. ट्विटरवर ते कित्येक वेळा अगदी हलक्या-फुलक्या स्वरुपात चर्चा करतात. यातच आता त्यांचं एक ट्विट व्हायरल होत आहे. मार्क झुकरबर्गबद्दल (Mark Zuckerberg) सुरू असलेल्या एका चर्चेमध्ये त्यांनी "त्याची तयारी असेल तर मी त्याच्यासोबत रिंगणातील लढाईला तयार आहे" अशा आशयाचं ट्विट केलं.

झुकेरबर्गने दिलं उत्तर

मस्कच्या या ट्विवर मार्क झुकरबर्गनेही प्रतिक्रिया दिली. मार्कने मस्क यांच्या ट्विटचा स्क्रीनशॉट आपल्या इन्स्टाग्राम स्टोरीवर शेअर करत, "मला लोकेशन पाठव" असा मेसेजही त्यावर लिहिला होता. (Elon Musk Mark Zuckerberg Cage Fight)

मस्कचं पुन्हा प्रत्युत्तर

झुकेरबर्गला उत्तर देत इलॉन मस्क यांनी 'व्हेगास ऑक्टॅगॉन' ही लोकेशन सांगितली आहे. यासोबतच एका ट्विटमध्ये ते मार्कला कशा प्रकारे हरवतील हेदेखील त्यांनी सांगितलं आहे. "माझ्याकडे एक डाव आहे, ज्याला मी 'वॉलरस' म्हणतो. यामध्ये मी माझ्या प्रतिस्पर्ध्याच्या अंगावर बसून राहतो, आणि काहीच करत नाही." अशा आशयाचं ट्विट त्यांनी केलं आहे.

त्यामुळे आता खरोखरच ही लढाई होते, की यावर मार्क झुकेरबर्ग आणखी काही प्रतिक्रिया देतात हे पाहणं औत्सुक्याचं ठरणार आहे.