Joe Biden: अमेरिकेचे अध्यक्ष जो बायडेन यांना कोरोनाची लागण झाल्याचं समोर आलं आहे. अमेरिकेच्या अध्यक्षपदाच्या निवडणुका नोव्हेंबरमध्ये होत आहेत. त्यांच्यासमोर रिपब्लिकन पक्षाचे तगडे उमेदवार डोनाल्ड ट्रम्प आहेत. अशातच त्यांना कोरोनाची लागण झाली असल्याने त्यांच्यासमोरील अडचणी वाढणार आहेत. व्हाईट हाऊसने यासंदर्भातील माहिती दिली आहे.

व्हाईट हाऊसच्या प्रेस सेक्रेटरी करिन जीन-पीरे यांनी सांगितलं की, आज लास वेगस याठिकाणी एक कार्यक्रम आयोजित करण्यात आला होता. पण, त्याआधी जो बायडेन यांची कोरोना चाचणी पॉझिटिव्ह आली आहे. त्यांना सौम्य प्रकारची लक्षणं आहेत. त्यांना सध्या विलगीकरणामध्ये राहावं लागणार आहे. पण, ते आपले कर्तव्य बजावत राहतील.

८१ वर्षीय जो बायडेन यांच्या अध्यक्ष पदाच्या उमेदवारीबाबत प्रश्न उपस्थित केले जात आहेत. अध्यक्ष पदाचा भार ते सांभाळू शकतील का? अशी चर्चा सुरु झाली आहे. असे असताना त्यांना कोरोनाची लागण झाल्याचे समोर आले आहे. यामुळे त्यांना काही दिवस प्रचारापासून दूर राहावे लागणार आहे. डोनाल्ड ट्रम्प यांनी प्रचारात आघाडी येतलेली आहे. अशावेळी बायडेन यांना आजार होणे डेमोक्रेटिक पक्षासाठी धोक्याची घंटा आहे.

रिपब्लिकन पक्षाचे अध्यक्षपदाचे उमेदवार डोनाल्ड ट्रम्प यांच्यावर दोन दिवसांपूर्वी जीवघेणा हल्ला झाला होता. यातून ते थोडक्यात बचावले आहेत. त्यांच्या कानाला गोळी चाटून गेली. या हल्ल्याचा अध्यक्षीय निवडणुकीवर परिणाम पडणार आहे. डोनाल्ड ट्रम्प यांच्या बाजूने वातावरण वळू लागले आहे. बायडेन पिछाडीवर गेले आहेत. अशात त्यांना कोरोनाची झालेली लागण त्यांना आणखी मागे आणणार आहे.

अमेरिकेमध्ये दर चार वर्षांनी नोव्हेंबर महिन्यामध्ये अध्यक्षपदाच्या निवडणुका होत असतात. जो बायडेन पुन्हा अध्यक्षपदासाठी मैदानात आहेत. तर, डोनाल्ड ट्रम्प सलग तिसऱ्यांदा अध्यक्षपदाची निवडणूक लढवत आहेत. २०१६ मध्ये ते राष्ट्राध्यक्ष झाले होते, पण २०२० मध्ये बायडेन यांनी त्यांचा पराभव केला होता. ते पुन्हा एकदा नशीब अजमावत आहेत.