नवी दिल्ली : रशियाचे राष्ट्राध्यक्ष व्लादिमीर पुतिन (President Vladimir Putin) भारत दौऱ्यावर येणार आहेत. पुतिन 6 डिसेंबर रोजी भारतात दाखल होणार असून यादरम्यान, भारत आणि रशिया यांच्यातील 2+2 चर्चा होणार आहे, अशी माहिती माहिती परराष्ट्र मंत्रालयाने (Ministry of External Affairs) दिली आहे. भारत आणि रशिया यांच्यातील "टू प्लस टू" चर्चेची पहिली बैठक 6 डिसेंबर रोजी नवी दिल्ली येथे होणार आहे. राष्ट्राध्यक्ष व्लादिमीर पुतिन यांच्या भारत भेटीबाबत गेल्या अनेक दिवसांपासून चर्चा केली जात होती, मात्र, पुतिन यांचा भारत दौरा निश्चित झाल्यामुळे या सर्व चर्चांवर आता पूर्णविराम लागला आहे.

भारत आणि रशियामध्ये 6 डिसेंबर रोजी टू प्लस टू चर्चा होणार आहे. दोन्ही देशांमधील या चर्चेमध्ये प्रामुख्याने राजकीय आणि संरक्षणविषयक मुद्द्यांचा समावेश असणार आहे. या दौऱ्यात पुतिन पंतप्रधान नरेंद्र मोदी यांचीही भेट घेणार असून, या द्विपक्षीय भेटीदरम्यान, दोन्ही देशांच्या राजकीय आणि संरक्षण मुद्द्यांवर चर्चा करण्यात येणार आहे, असे परराष्ट्र मंत्रालयाचे प्रवक्ते अरिंदम बागची (Arindam Bagchi) यांनी सांगितले.

नोव्हेंबर 2019 मध्ये ब्रासिलीयामध्ये झालेल्या BRICS (ब्राझील, रशिया, भारत, चीन आणि दक्षिण आफ्रिका) शिखर परिषदेनंतर पुतिन आणि पंतप्रधान नरेंद्र मोदी यांच्यातील ही पहिलीच वन-ऑन-वन ​​बैठक असणार आहे. परराष्ट्र मंत्री एस. जयशंकर आणि संरक्षण मंत्री राजनाथ सिंह या बैठकीत भारताचे प्रतिनिधित्व करणार आहेत, तर रशियाचे परराष्ट्र मंत्री सर्गेई लावरोव आणि रशियाचे संरक्षण मंत्री सर्गेई शोइगु त्यांच्या देशाचे प्रतिनिधित्व करणार आहेत.