सिलानपिनार (तुर्कस्तान) - सीरियाच्या सीमेवर असलेल्या एका गावावर तुर्कस्तानच्या सैन्याने ताबा मिळविला असल्याचा दावा तुर्कस्तानने केला आहे. कुर्द बंडखोरांशी लढत असलेल्या तुर्कस्तानने रास अल-अयान या गावावर बाँबवर्षाव करत त्यावर ताबा मिळविला. 

अमेरिकेने या सीरियातून फौजा काढून घेतल्यानंतर आणि तुर्क-कुर्द यांच्यातील ‘अंतहिन संघर्षा’तून लक्ष काढून घेतल्यानंतर तुर्कस्तानने सीरियाविरोधात आक्रमक रूप धारण केले आहे. तुर्कस्तानने सीरियात अतिक्रमण सुरू केल्यानंतर जवळपास एक लाख लोक बेघर झाले असून, या परिस्थितीचा ‘इसिस’ फायदा घेण्याची शक्‍यता अभ्यासकांनी व्यक्त केली आहे. तुर्कस्तानला थांबविण्याची मागणी आधीच युद्धजर्जर झालेल्या सीरियाने संयुक्त राष्ट्रांकडे केली आहे.

तुर्कस्तानी सैनिकांनी सीरियात घुसखोरी करून ताबा मिळविलेल्या गावातील नऊ जणांना पकडून त्यांची जाहीर हत्या केली. 

युरोपमध्ये निदर्शने
तुर्कस्तानने केलेल्या घुसखोरीविरोधात युरोपमधील अनेक देशांमध्ये मानवाधिकार संघटनांनी निदर्शने केली. तुर्कस्तानचे अध्यक्ष रेसेप तय्यीप एर्दोगान यांच्याविरोधात नारेबाजीही करण्यात आली. या निदर्शनांमध्ये सुमारे वीस हजार जण सहभागी झाले होते. 

शस्त्रनिर्यात थांबविली
तुर्कस्तानच्या घुसखोरीनंतर फ्रान्स आणि जर्मनीने या देशाला केली जाणारी शस्त्रनिर्यात थांबविली आहे. तसेच, या संघर्षाच्या परिस्थितीनंतर युरोपीय  महासंघाचीही बैठक होणार असून त्यामध्येही तुर्कस्तानवर बंधने घालण्याबाबत निर्णय होण्याची शक्‍यता आहे.