मॉस्को/नवी दिल्ली : मतभेद मिटविण्यासाठी भारताचे पंतप्रधान नरेंद्र मोदी यांच्याशी दूरचित्रवाणीच्या व्यासपीठावर वादविवाद करण्याची तयारी पाकिस्तानचे पंतप्रधान इम्रान खान यांनी दर्शविली आहे. दोन दिवसांच्या रशिया दौऱ्यावर रवाना होत असलेल्या इम्रान यांनी रशिया टुडे या वाहिनीला मुलाखत दिली. रशियन सरकारचे या वाहिनीला निधी पुरविते तसेच सरकारचे त्यावर नियंत्रण आहे. इम्रान म्हणाले की, वादविवादाच्या माध्यमातून मतभेदांवर तोडगा निघाला तर ते एक अब्जाहून जास्त लोकसंख्या असलेल्या भारतीय उपखंडासाठी उपयुक्त ठरेल. (Imran Khan)

दरम्यान, याविषयी भारताच्या परराष्ट्र मंत्रालयाकडून अद्याप कोणतीही प्रतिक्रिया देण्यात आलेली नाही. उभय देश ७५ वर्षांपूर्वी फाळणीनंतर स्वतंत्र झाले. तेव्हापासून संबंध तणावपूर्ण राहिले आहेत. आतापर्यंत तीन वेळा युद्ध झाले आहे. दहशतवाद आणि संवाद एका वेळी होऊ शकत नाही असे भारताने पाकिस्तानला ठणकावले आहे. पाकने दहशतवादी गटांवर निर्बंध लादावेत तसेच संयुक्त राष्ट्रांनी ज्यांचा यादीत समावेश केला आहे त्या तसेच इतर दहशतवाद्यांवर कारवाई करावी अशी मागणी केली आहे.

युक्रेनबाबत मुत्सद्देगिरी

इम्रान या दौऱ्यात रशियाचे अध्यक्ष व्लादिमीर पुतीन यांना भेटणार आहेत. आर्थिक सहकार्याबाबत चर्चेसाठी त्यांनी हा दौरा आखला आहे. युक्रेनबाबतच्या घडामोडींपूर्वी हे नियोजन झाले होते. सध्याच्या घडामोडींबाबत छेडले असता, इम्रान यांनी स्पष्ट केले की, आमचा याच्याशी संबंध नाही. आमचे रशियासह द्विपक्षीय संबंध आहेत, जे आम्हाला खरोखरच बळकट करायचे आहेत.