कोरोनाचा नविन व्हेरिएंट ओमिक्रॉन (Omicron) सर्वात पहिल्यांदा दक्षिण आफ्रिकेत आढळून आला आहे. आता जगभरातील ३८ देशांमध्ये याचा प्रसार झाला असून, अद्यापही या संसर्गामुळे एकाही मृत्यूची नोंद झाली नाही, अशी माहिती जागतिक आरोग्य संघटनेने (WHO) दिली. दरम्यान, वाढत्या रुग्णसंख्येचा फटका जागतिक अर्थव्यवस्थेला बसण्याची शक्यता वर्तवण्यात आली आहे.

द गार्डीयन संकेतस्थळाने दिलेल्या माहितीनुसार, दक्षिण आफ्रिकेत ओमिक्रॉन (Omicron) संसर्गाची ३० लाख प्रकरणे समोर आली आहेत. युनायटेड स्टेट्स आणि ऑस्ट्रेलियातही ओमिक्रॉनच्या नव्या रुग्णांची नोंद करण्यात आली. WHO ने सांगितले आहे की, ओमिक्रॉन किती संसर्गजन्य आहे, त्याने रुग्ण गंभीर होतो का, त्यावर उपचार आणि लस किती प्रभावी ठरते यावरती अभ्यास सुरु असून, त्यासाठी काही आठवड्यांचा कार्यकाळ लागू शकतो.

पुढे त्यांनी म्हटलं की, अद्याप ओमिक्रॉन (Omicron) संबंधित मृत्यूचे कोणतेही अहवाल समोर आले नाही. मात्र, या संसर्गाच्या प्रसारामुळे येत्या काही महिन्यां मध्ये युरोपात अर्ध्याहुन अधिक जणांना याची लागण होऊ शकते, असा इशाराही त्यांनी दिला. आंतरराष्ट्रीय नाणेनिधीच्या प्रमुख क्रिस्टालिना जॉर्जिएवा म्हणाल्या, डेल्टा संसर्गाप्रमाणेच ओमिक्रॉन (Omicron) मुळे जागतिक अर्थव्यवस्थेला धक्का बसण्याची शक्यता आहे. दरम्यान, दक्षिण आफ्रिकेतील संशोधकांनी केलेल्या प्राथमिक अभ्यासात, डेल्टा आणि बीटा स्ट्रेनच्या तुलनेत ओमिक्रॉन चा पुन्हा संसर्ग होण्याची शक्यता तिप्पट आहे.