Vision Restoration Programs For Underprivileged Cataract Patients: केंद्र सरकारच्या मोतीबिंदू मुक्त भारत अभियानाला बळ देण्यासाठी वेस्टर्न कोल फिल्डने सामाजिक उत्तर दायित्वातून इंदिरा गांधी शासकीय वैद्यकीय महाविद्यालयाशी (मेयो) सामंजस्य करार केला आहे.

या अभियानातून वेकोलिच्या सहकार्याने मेयो मोतीबिंदू शल्यक्रिया शिबिर राबवीत आहे. वर्षभरात ५ हजार जणांच्या मोतीबिंदू शल्यक्रियेचे उद्दिष्ट ठेवण्यात आले आहे. पहिल्या दोन महिन्यांत ६१९ जणांचे अंधत्व दूर झाले.

ग्रामीण भागात नेत्रतपासणी शिबिरांमधून लाभार्थ्यांची निवड केली जाते. ज्या नागरिकांना मोतीबिंदू आढळेल त्यांना मेयोच्या नेत्र विभागात बोलावून त्यांची अंधत्वातून मुक्तता केली जात आहे.

मेयोचे अधिष्ठाता डॉ. रवी चव्हाण हे स्वतः नेत्ररोग शल्यचिकित्सक असल्याने त्यांच्या पुढाकाराने वेकोलिसोबत हा सामंजस्य करार करण्यात आला. त्यामुळे वेकोलिने अडीच कोटींचा निधी मेयोच्या खात्यात वळता केला आहे. या निधीतून मोतीबिंदू शल्यक्रियांसाठी लागणारी वैद्यकीय उपकरणे, साहित्य आणि औषधांसोबतच शल्यक्रियेनंतर चष्मा देखील वितरित केला जात आहे.

अशी झाली मोतीबिंदू मुक्ती

• मार्च २०२५ - ३०२

• एप्रिल २०२५ - २१९

• २२ मे २०२५ पर्यंत - ९८

• एकूण - ६१९

नि:शुल्क शल्यक्रिया

मेयोने चालू वर्षात आतापर्यंत ६१९ जणांच्या नेत्रांमधील मोतीबिंदू दूर केला. या शस्त्रक्रियांपैकी जास्तीत जास्त शस्त्रक्रिया या अद्ययावत फेकोमिल्सिफिकेशन पद्धत व फोल्डेबल लेन्स टाकून केल्या गेल्या. या शस्त्रक्रियेसाठी रुग्णांना खासगी रुग्णालयात प्रत्येकी किमान १५ त २० हजार रुपये मोजावे लागले असते. मात्र मेयो रुग्णालयाने या सर्व शस्त्रक्रिया मोफत केल्या. यासाठी विभागप्रमुख आणि अधिष्ठाता डॉ. रवी चव्हाण यांच्या नेतृत्वाखाली डॉ. राहुल डगवार, डॉ. सचिन अग्रवाल, डॉ. जयश्री इखार या डॉक्टरांच्या चमूने मोलाचे योगदान दिले.