Jalgaon News : येथील अर्बन को.- ऑप बँकेची निवडणूक जाहीर होताच शेकडो इच्छुक उमेदवारांनी निवडणूक लढविण्यासाठी कंबर कसली असून, पहिल्याच दिवशी गुरुवारी (ता. ४) इच्छुकांनी निवडणूक कार्यालयात उमेदवारी अर्ज खरेदीसाठी एकच गर्दी केली होती. (Amalner Urban Bank Election 31 candidates took 81 applications jalgaon news)

पहिल्याच दिवशी ३१ जणांनी ८१ उमेदवारी अर्ज खरेदी केले, तर सर्वसाधारण प्रवर्गातून विद्यमान संचालक प्रदीप कुंदनलाल अग्रवाल व अनुसूचित जाती जमातीमधून रघुनाथ मोरे या दोघांनी अर्ज दाखल केले आहेत.

उमेदवारी अर्ज खरेदी व दाखल करण्याची मुदत ११ मेपर्यंत असून, या मुदतीत उमेदवारी अर्जाचा पाऊसच यंदा पडण्याची शक्यता वर्तविली जात आहे.

हेही वाचा : संतुलित आहारातून रोखा फॅटी लिव्हरचा आजार

नगरपालिका निवडणूक लांबत चालली असल्याने बाशिंग बांधून तयार असलेले पालिकेतील इच्छुक उमेदवार कमालीचे नाराज आहेत. मात्र, अर्बन बँकेची निवडणूक जाहीर झाल्याने याच इच्छुकांना आता अर्बन बँकेचा संचालक होण्याचे डोहाळे लागले आहेत.

त्यासाठी ते तयारीला लागले आहेत. यामुळेच यंदा उमेदवारी करण्याची अनेकांची इच्छा असून, उमेदवारांची संख्या यंदा अधिक असण्याची शक्यता आहे. हवशा-गवशा-नवश्या उमेदवारांची संख्या अधिक राहणार असली, तरी खरी लढत तुल्यबळ उमेदवारांमध्येच होणार आहे.