जळगाव : महापालिकेकडून (Jalgaon Municipal Corporation) शहरातील औद्यौगिक वसाहतीत (MIDC) ५० मायक्रॉनपेक्षा कमी जाडीच्या कॅरी बॅग (Carry Bags) तयार करणाऱ्या कंपनीचे गोदाम (Warehouse) ‘सील’ (Seal) करण्यात आले. महापालिका आयुक्तांनी (municipal commissioner) सोमवारी (ता. ६) ही धडक कारवाई केली. (Carry bag factory warehouse sealed Action of Jalgaon Municipal Commissioner Jalgaon News)

महापालिका आयुक्त विद्या गायकवाड (Jalgaon Municipal Corporation Commissioner) यांनी सध्या महापालिकेत कामाचा जोरदार धडका लावला आहे. त्यांनी सोमवारी औद्यौगिक वसाहतीतील कॅरी बॅग बनविणाऱ्या कारखान्यावर थेट छापा टाकला. त्या ठिकाणी ५० मायक्रॉनपेक्षा कमी जाडीच्या कॅरी बॅग मोठ्या प्रमाणात तयार करण्यात येत असल्याचे आढळून आले. त्यांनी तातडीने या कारखान्याच्या गोदामाची तपासणी केली. त्या ठिकाणीही मोठ्या प्रमाणात कॅरी बॅगचा साठा आढळून आला. त्या वेळी त्यांनी थेट गोदामच सील करण्याचे आदेश दिले. त्यानुसार कर्मचाऱ्यांनी कारवाई केली. या वेळी अधिकारी मनीष महाजन, अतिक्रमण अधीक्षक संजय ठाकूर, आरोग्य निरीक्षक जितेंद्र किरंगे तसेच अतिक्रमणविरोधी पथकाचे कर्मचारी उपस्थित होते.

आयुक्तांचे आवाहन

शहरात ५० मायक्रॉनपेक्षा कमी जाडीच्या कॅरी बॅगचा वापर कोणीही करू नये. ते पर्यावरणास हानीकारक आहे. या बॅग उत्पादन करणारे, विक्री करणारे तसेच त्याचा वापर करणारे यांच्यावरही कारवाई करण्यात येत आहे. तसेच पालेभाज्या, फळे, इतर खाद्यपदार्थ विक्रेत्यांनीही अशा बॅगा ठेवू नयेत, ज्या विक्रेत्यांकडे त्या आढळतील त्यांच्यावरही कडक कारवाई करण्यात येईल, असा इशाराही त्यांनी दिला आहे.