एरंडोल (जळगाव) : विवाह होऊन एक वर्षाचा कालावधी पूर्ण होत नाही, तोच माहेराहून नवीन घरासाठी दहा लाख रुपये घेऊन ये, अशी मागणी करुन १९ वर्षीय विवाहितेच्या चारित्र्यावर संशय घेऊन तिला शिवीगाळ व मारहाण केल्याप्रकरणी विवाहितेचा पती, सासू, सासरा, नणंद, मावस सासरा व मावस सासू अशा आठ संशयितांविरोधात विवाहितेच्या तक्रारीवरून पोलिसात गुन्हा दाखल करण्यात आला आहे.

गांधीपुरा भागातील निकिता विजय नाईक (वय १९) यांचा विवाह सुनील सोपान घ्यार (रा. धोंडखेड, ता. मोताळा, जि. बुलढाणा) याच्याशी ४ जून २०२१ ला उमरदे (ता. एरंडोल) येथे झाला होता. लग्नात निकिताचे वडील विजय नाईक यांनी अडीच लाख रुपये रोख, दागिणे, मूळ लावताना संसारापयोगी वस्तू दिल्या. विवाहितेचा पती सुनील घ्यार हा जळगावला वीज वितरण कंपनीत आहे. लग्नानंतर एक महिन्यांनी सासू आशाबाई सोपान घ्यार व नणंद सविता सोपान घ्यार हे तिला शेतीची कामे येत नाही यावरुन निकीताला त्रास देऊ लागले.

पती सुनील मारहाण करुन तिच्या चारित्र्यावर संशय घेऊ लागला. तिने जळगाव येथे नवीन घर घेण्यासाठी दहा लाख रुपये आणावेत, या मागणीसाठी तिला छळ होऊ लागला. याची माहिती निकिताने माहेरी आल्यानंतर वडिलांना दिली. त्यावर तिची समजूत घालून पुन्हा सासरी रवाना केले. मात्र, सासू आशाबाई घ्यार यांनी निकिताने माहेरहून पाच लाख रुपये आणावेत, अशी मागणी केली.

ऑगस्टमध्ये निकिता व पती सुनील घ्यार हे जळगावला राहण्यासाठी आले असता मावस सासू सुरेखा नामदेव घुगे, मावस सासरे नामदेव दगडू घुगे, छाया सुरेंद्र नाईक यांनी नवीन घरासाठी दहा लाखांची मागणी केली. मागणी पूर्ण न झाल्याने ९ जानेवारीला सासरच्यांनी तिला घराबाहेर काढले.

याबाबत निकिता नाईक यांनी दिलेल्या तक्रारीवरून पती सुनील घ्यार, सासरे सोपान घ्यार, सासू आशाबाई घ्यार, नणंद सविता घ्यार, मावस सासरे नामदेव घुगे, मावस सासू सुरेखा घुगे, मावस दीर सचिन घुगे, मावस सासू छाया नाईक यांच्या विरोधात गुन्हा दाखल केला असून पोलीस निरीक्षक ज्ञानेश्वर जाधव यांच्या मार्गदर्शनाखाली तपास सुरु आहे.