जळगाव : विकासासाठी आवश्यक असणारी बाब म्हणजे निधी, अर्थात गल्ला असून यात कोणत्याही प्रकारची कमतरता पडू देणार नाही, असे आश्‍वासन पालकमंत्री गुलाबराव पाटील यांनी रविवारी (ता. २४) वडनगरी येथे दिले. तालुक्यातील वडनगरी येथे विकास कामांचे भूमिपूजन व लोकार्पणाचा कार्यक्रम झाला. त्यावेळी ते बोलत होते. प्रमुख पाहुणे म्हणून शिवसेनेचे जिल्हाप्रमुख विष्णूभाऊ भंगाळे, तालुकाप्रमुख राजेंद्र चव्हाण, जनाआप्पा कोळी, बाजार समिती सभापती कैलास चौधरी उपस्थित होते.

पालकमंत्री म्हणाले, की परिसरासाठी आज स्मशानभूमी पोहच रस्ता तयार झाला असून याच्या जोडीला गावातील विविध विकासकामांचे प्रस्ताव सादर करण्याचे निर्देश देण्यात आले आहेत. यात प्रामुख्याने गावाजवळचा पुल, रस्त्यासह स्मशानभूमी सुशोभीकरण, व्यायाम शाळेचे प्रस्ताव सादर करण्याचे निर्देश दिलेत. प्रास्ताविक वडनगरीचे सरपंच उमाकांत पाटील यांनी केले. तालुकाप्रमुख राजेंद्र चव्हाण यांनी सूत्रसंचालन केले. आभार ग्रामसेवक सतीश पाटील यांनी मानले.