Jalgaon News : येथील गोलाणीमार्केट मध्ये साफसफाई होत नसल्याने मोठ्या प्रमाणावर कचरा साचला होता. अनेक महिन्यांपासून घाण साचली होती. याबाबत गोलाणीतील व्यावसायिक, नागरिकांच्या तक्रारीवरून गोलाणी मार्केटमध्ये स्वच्छता मोहीम महापालिकेच्या आरोग्य विभागातर्फे रविवारी (ता. ७) राबविण्यात आली. त्यात तब्बल १७ टन कचरा गोळा करण्यात आला. (17 tons of waste removed from Golani)

महापालिकेच्या आरोग्य विभागाचे सहाय्यक आयुक्त उदय पाटील यांच्या मार्गदर्शनाखाली गोलाणी मार्केटमध्ये रविवारी स्वच्छता अभियान राबविण्यात आले. ११० कर्मचाऱ्यांनी गोलाणी मार्केटमधील पहिला व दुसरा मजला, तसेच मार्केटच्या चारही बाजूला साचलेला कचरा गोळा केला.

आरोग्य निरीक्षक या अभियानात रमेश कांबळे, नागेश लोखंडे, यु. आर. इंगळे, युनिटप्रमुख अजय चांगरे, सुरेश भालेराव, कुणाल बारसे, विशान वानखेडे, मुकादम शरद पाटील, एकनाथ दांडके, वालिदास सोनवणे, सिद्धर्थ चांगरे, शंकर अंभोरे, राहुल पवार, भरत सपकाळे, भीमराव सपकाळे, रवी सनकत, जगन्नाथ पाटील, विशाल चांगरे व कर्मचारी सहभागी झाले होते. (latest marathi news)

लिफ्टही केली स्वच्छ

गोलाणी मार्केटमधील पहिल्या व दुसऱ्या मजला, तळमजला व परिसर व बंद लिफ्टमधे साचलेला कचरा गोळा केला. यात ३ पीकअप, ३ घंटागाड्यांच्या दोन फेऱ्यांमधून कचरा गोळा केला.