जळगाव : शहरातील मासुमवाडी परिसरात गावठी पिस्तूल विक्रीसाठी बाळगून असलेल्या संशयिताला एमआयडीसी पोलिसांनी शिताफीने अटक केली आहे. त्याच्या ताब्यातून दोन पिस्तूल जप्त केले आहेत.मासुमवाडी परिसरात गावठी पिस्तूल विक्रेता येणार असल्याची माहिती पोलिस निरीक्षक प्रताप शिकारे यांना मिळाली होती.

गुन्हे शोध पथकाने साध्यावेशात परिसरात सापळा रचला असता अली ऊर्फ डॉलर शाहरुख शकील अली (वय २९. रा. गेंदालालमील) याला संशयित हालचालींचा अंदाज घेत ताब्यात घेतले. चौकशी केल्यावर उडवाउडवीची उत्तरे देत असताना त्याची अंग झडती घेतल्यावर त्याच्याजवळ दोन गावठी पिस्तूल आढळून आले. त्याला अटक करुन पोलिस कर्मचारी चंद्रकांत बळीराम पाटील यांच्या तक्रारीवरून बेकायदा शस्‍त्र बाळगल्याप्रकरणी गुन्ह्याची नोंद करण्यात आली आहे. साहाय्यक फौजदार अतुल वंजारी तपास करीत आहेत.