Jalgaon Unseasonal Rain Damage : येथील भारतीय जनता पक्षाच्या किसान मोर्चाच्या पदाधिकाऱ्यांनी तालुक्यात मंगळवारी (ता. २७) झालेल्या बेमोसमी पाऊस व गारपीटमुळे नुकसान झालेल्या शेतकऱ्यांच्या बांधावर जाऊन नुकसानीची पाहणी केली. यावेळी आमदार मंगेश चव्हाण यांनी शेतकऱ्यांशी संवाद साधून त्यांना धीर दिला.

तालुक्यातील वरखेडे, लोंढे, विसापूर व दरेगाव या गावात पाहणी करतेवेळी भाजपचे तालुकाध्यक्ष सुनील निकम उपस्थित होते.

आमदार मंगेश चव्हाण यांनी शेतकऱ्यांना झालेल्या नुकसानीची मदत मिळवून देण्यासाठी मी पूर्णपणे तुमच्या सोबत आहे, असे आश्वासित केले. त्यांनी शेतकऱ्यांच्या वेदना समजून घेतल्या व तेथूनच प्रांताधिकारी प्रमोद हिले व तहसीलदार प्रशांत पाटील यांना फोन करून प्रत्यक्ष पाहणीसाठी बोलविले.

त्यानुसार, या दोन्ही अधिकाऱ्यांसह मेहुणबारे पोलिस ठाण्याचे सहाय्यक निरीक्षक संदीप परदेशी यांनी शेतात येऊन नुकसानाची पाहणी केली.

यावेळी भाजपच्या किसान मोर्चाचे प्रदेश उपाध्यक्ष पोपट भोळे, किसान मोर्चाचे जिल्हाध्यक्ष विजय पाटील, तालुकाध्यक्ष देवेंद्र पाटील, जिल्हा चिटणीस राजेंद्र साबळे, जिल्हा उपाध्यक्ष घनश्याम पाटील उपस्थित होते.