निंभोरा बुद्रुक (ता. रावेर) : येथील रेल्वेस्थानकावरून तब्बल बारा वर्षांनंतर सतरा व्हीपीयू रेक शुक्रवारी (ता. ७) वॅगन्स दिल्लीकडे रवाना झाले आहेत. निंभोरा स्थानक येथून परप्रांतात केळी पाठविण्यासाठी वॅगन्स रेक मिळावा म्हणून निंभोरा स्टेशन येथील फळबागायतदार शेतकरी मंडळातर्फे व केळी उत्पादक शेतकऱ्यांतर्फे खासदार रक्षा खडसे तसेच रेल्वे विभागाचे डीआरएम ईती पाण्डेय यांच्याकडे सातत्याने पाठपुरावा सुरू होता. या मागणीला यश मिळाल्याने केळी उत्पादक शेतकऱ्यांनी आनंद व्यक्त केला. (Green Signal to Banana Wagons from Nimbhori)

निंभोरा रेल्वे स्थानकावरून शुक्रवारी (ता. ७) सतरा वॅगन्समधून केळी रवाना झाली. या वॅगन्समधून सुमारे ३ हजार ७४० क्विंटल केळी भरून रवाना करण्यात आली, अशी माहिती अध्यक्ष कडू चौधरी, उपाध्यक्ष मोहन पाटील, गणेश पाटील, विजय महाजन, किरण नेमाडे, विनोद पाटील, मनोहर चौधरी यासह मंडळ पदाधिकाऱ्यांनी माहिती दिली.

बारा वर्षांच्या खंडानंतर प्रथमच रेल्वेतून केळी परप्रांतात जाणार असल्याने निंभोरा फळ बागायतदार मंडळाचे अध्यक्ष कडू चौधरी व संचालक किरण नेमाडे तसेच सहाय्यक पोलिस निरीक्षक हरिदास बोचरे, शेतकरी ललित कोळंबे यासह केळी उत्पादक शेतकऱ्यांनी रेल्वे वॅगन्स इंजिन चालक गार्ड तसेच स्टेशन अधीक्षक यांचा सत्कार करून रेल्वे इंजिनची व वॅगन्सची विधिवत पूजा करून पुष्पहार अर्पण करण्यात येऊन केळी भरण्याचा प्रारंभ करण्यात आला. (latest marathi news)

रेल्वेस्थानक परिसर गजबजला

दरम्यान, सायंकाळी साडेसहा दरम्यान रेल्वे प्रशासनाकडून वॅगन्स उशिरा मिळाल्याने रात्री उशिरापर्यंत केळी वॅगन्स दिल्लीकडे रवाना झाल्या. यामुळे स्टेशन परिसरात मोठ्या प्रमाणात गर्दी झाली होती. स्टेशन परिसरामध्ये केळी वाहतूक करणारे ट्रॅक्टर, तसेच वाहनधारक व कामगार, केळी उत्पादक शेतकरी यांची मोठ्या प्रमाणात गर्दी झाली होती. यामुळे स्टेशन परिसर गजबजला होता. सर्वत्र मोठ्या प्रमाणात गर्दी असल्याने शेतकऱ्यांसोबतच मजूर वर्गांच्या चेहऱ्यावर उत्साह दिसून येत होता.