बोदवड : शहरातील सहकार नगरमधील मुकेश दयाराम बडगुजर यांच्या घराला बुधवारी (ता. २) सकाळी नऊ ते दहाच्या सुमारास भीषण आग लागली. या आगीत बडगुजर यांच्या घरातील जीवनावश्यक वस्तू, अन्नधान्य, घरात असलेली पाच क्विंटल कपाशी व दीड लाख रुपये रोख जळून खाक झाले. बडगुजर यांच्या घरातील सर्व मंडळी सकाळी नऊच्या सुमारास शेतात गेले होते. या दरम्यान घराच्या आतून धुराचे लोळ येत असल्याचे शेजारी राहणाऱ्या नागरिकांनी नगरसेवक भरत पाटील व संजय गायकवाड यांना सांगितले. ( House fire in Bodwad city consumes 5 quintals of cotton )

त्यानंतर तत्काळ फायर ब्रिगेड बुलेटला पाचारण करण्यात आले. या आगीत जीवनावश्यक वस्तू, अन्नधान्य, घरात असलेली पाच क्विंटल कपाशी व जय माता की जीनिंगमधून आणलेली १ लाख ६२ हजार रुपये प्लॉटचा व्यवहार करण्यासाठी रक्कम घरात ठेवलेली होती. ती रक्कमही जळून खाक झाली. यावेळी भरत पाटील यांनी मुकेश बडगुजर यांना २१०० रूपये मदत दिली. नगराध्यक्ष आनंदा पाटील, हर्षल बडगुजर, सुनील बोरसे, गोपाल गंगतिरे यासह सर्वपक्षीय नगरसेवकांनी मदतीचा हात पुढे केला. या वेळी फायर बुलेट चालक मुनाफ व फायरमन संदीप तायडे यांनी आग विझविली. तलाठी जे. एस. सुरवाडे व कोतवाल रामभाऊ देशमुख यांनी पंचनामा केला.